Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A pesar de conformar o groso da tradución ao galego, os libros de texto e os de lectura obrigatoria no sistema educativo non aparecen recollidos nos estudos realizados sobre o sector da tradución en Galicia. Este baleiro levou a profesora do Departamento de Tradución e Lingüística da Universidade de Vigo Liliana Valado a realizar na súa tese de doutoramento unha análise pormenorizada das publicacións traducidas ao galego.
Fonte: Universidade de Vigo
O Goberno foral valora o coñecemento do inglés para traballar como técnico ou xestor de Facenda na Administración Pública de Navarra e, no entanto, non concede punto ningún por saber éuscaro, lingua cooficial en boa parte do territorio.
Fonte: Noticias de Navarra
Aquelas persoas que queiran mellorar o seu éuscaro oral falando, ou as que queiran dedicar algo de tempo a charlar con estes para axudalos a soltarse, teñen a ocasión de participar no programa Berbetan que organiza Eta Kitto Euskara Elkartea. O obxectivo desta iniciativa é «ofrecerlles ás persoas que queiran mellorar a súa capacidade de falar en éuscaro, un lugar onde facelo de forma informal e nun ambiente distendido», sinalan desde a organización.
A última falante nativa coñecida da lingua klallam, que o Goberno dos Estados Unidos tentou eliminar gradualmente antes de financiar un plan para preservala, faleceu no estado de Washington, dixeron amigos e líderes tribais.
Fonte: Newsmax
O Concello donostiarra emprendeu unha campaña dirixida aos seus traballadores para animalos a que a súa primeira palabra cos cidadáns sexa en éuscaro. Na actualidade o 73 % dos 1397 empregados municipais (incluídos os de organismos autónomos) son euscaldúns e o Goberno municipal espera seguir ampliando esa porcentaxe.
Fonte: Noticias de Gipúzkoa
A XXVIII edición dos Premios Goya, que organiza anualmente a Academia das Artes e as Ciencias Cinematográficas de España, pode seguirse en directo en lingua de signos española a través da páxina web de RTVE www.rtve.es, segundo informa o Centro de Normalización Lingüística da Lingua de Signos Española (CNLSE).
Fonte: Telecinco
Arredor de 100 persoas manifestáronse en Riga (Letonia) para solicitarlle á primeira ministra letoa, Laimdota Straujuma, que garanta o ensino en ruso nas escolas.
Fonte: The Baltic Times
Nos últimos tempos, a lingua turca ten gañado certa popularidade en varias rexións de Afganistán. A maior presenza de empresas turcas no país asiático contribúe a incrementar o interese dos afgáns polo estudo desta lingua.
Fonte: World Bulletin
O Equipo de Dinamización da Lingua Galega do CPI de Mondariz organiza o concurso “Co galego na túa camiseta”, que ten como obxectivo premiar o/a autor/a da camiseta co lema máis creativo, de entre todas as elaboradas no obradoiro de camisetas con lemas ou ditos en galego que se desenvolveu o pasado mes de xaneiro neste centro educativo.
Fonte: Consello da Cultura Galega
As consellerías de Cultura, Educación e Ordenación Universitaria e de Traballo e Benestar, a través da Secretaría Xeral de Política Lingüística e da Dirección Xeral de Xuventude e Voluntariado, veñen de convocar a nova edición do certame Lingua de namorar que busca fomentar o uso do galego entre os mozos e mozas, especialmente en momentos de lecer.
Fonte: Xunta de Galicia
Subscríbase ao boletín
