Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O profesor Almidio Aquino, integrante da Academia da Lingua Guaraní, declarou que a institución funciona sen orzamento e que os gastos que se orixinan se cobren con achegas dos seus membros. Porén, a Academia está no proceso final de elaboración dos seus estatutos, primeiro paso para poder cumprir a súa función principal: a creación dun alfabeto e gramática oficiais da lingua guaraní.
Fonte: Última Hora
Unha experta independente das Nacións Unidas declarou que a metade das máis de 6000 linguas que se falan no mundo desaparecerán a finais do século se non se realizan os esforzos necesarios para salvalas. Ademais, salientou que as linguas minoritarias son unha causa frecuente de tensións para moitos gobernos cuxa única obriga é garantir a súa protección.
Fonte: United Nations
A Xunta de Galicia facilitaralles aos concellos galegos un sistema de tradución automatizada directa e inversa do galego ao castelán e mais ao portugués, que lle permitirá á Administración local galega aumentar a calidade lingüística da súa documentación técnica e administrativa, webs e correos electrónicos, ademais de reforzar e consolidar a aplicación da toponimia oficial de Galicia.
Haberá recurso de casación da Real Academia Galega ante a sentenza do Tribunal Superior de Xustiza de Galicia sobre o Decreto para o plurilingüismo no ensino.
Fonte: Culturagalega.org
O Tribunal Superior de Xustiza de Valencia deulle a razón a Acción Cultural tras o seu recurso contra unha orde da Consellería de Educación que non recoñecía o título de Filoloxía Catalá por acreditar “coñecementos de valenciano” nas probas de acceso ao profesorado do ano 2009.
Fonte: El Punt Avui
O Instituto de Euscaldunización e Alfabetización do Goberno vasco, HABE, presentou un novo método de aprendizaxe de éuscaro, denominado “Primeran!”, dirixido aos alumnos dos niveis básicos A1 e A2.
Fonte: Diario Vasco
Twitter inaugura unha nova funcionalidade para os seus usuarios: a posibilidade de descargar "tweets" para que estes non se perdan na inmensidade da rede social. A opción xa está dispoñible no idioma orixinal, o inglés, desde decembro, mais a rede social decidiu agora ampliala a doce linguas máis.
Fonte: Dinheiro Vivo
Hoxe en día cada vez máis estudos universitarios de Finlandia son en lingua inglesa. Porén, este avance non é visto con bos ollos por moitos académicos que consideran que pode pór en risco as linguas oficiais do país.
Fonte: Uutiset
Seis meses despois da súa presentación, os promotores da Iniciativa Lexislativa Popular Valentín Paz Andrade presentan no Parlamento de Galicia as 17 000 sinaturas que permitirán comezar a súa tramitación parlamentaria. O proxecto propón que se incorpore de xeito progresivo o portugués no ensino galego, ademais de medidas que garantan a recepción de radios e televisións portuguesas en Galicia ou a participación de institucións e empresas galegas en foros económicos, culturais e deportivos da lusofonía.
A Concellería de Normalización presentou a segunda edición do Galegote Rock que se celebrará en abril na Sala Karma da cidade de Pontevedra.
Fonte: Concello de Pontevedra
Subscríbase ao boletín
