Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Canadá, a través da Axencia Internacional Canadense para o Desenvolvemento, contribúe con 5,6 millóns de dólares a apoiar a Sri Lanka para que poña en marcha a súa política nacional de linguas. Canadá compartirá con Sri Lanka o seu coñecemento e a súa experiencia para a implantación do bilingüismo.
Fonte: Colombo Page
O responsable de Política Lingüística, Anxo Lorenzo, recordou o labor realizado por Fermín Bouza Brey a prol da lingua galega no ámbito da xustiza. Fíxoo no acto de homenaxe organizado pola Irmandade Xurídica Galega, que promoveu a instalación dun busto do maxistrado en Pontevedra, na praza que leva o seu nome.
Fonte: Xunta de Galicia
A lexislación vixente sostén que os graduados en Dereito en Galicia deben estar preparados para satisfaceren na súa actividade profesional os dereitos lingüísticos dos cidadáns recoñecidos na Constitución, o Estatuto de Autonomía ou a Lei de normalización lingüística tales como poder dirixirse en galego á Administración pública con sede en Galicia e esixir o seu uso.
A Agrupación Universitaria polo Asturiano (CUPA) acaba de presentar ante a Universidade de Oviedo unha reclamación formal sobre o Regulamento de Estudos de Doutoramento para que se permita a presentación de teses de doutoramento en lingua asturiana, unha posibilidade que nestes momentos a norma non recolle.
Fonte: Europa Press
A Comunidade dos Países de Lingua Portuguesa prepárase para recibir a Guinea Ecuatorial como novo membro do grupo. Outros países como Ucraína e as Illas Mauricio xa demostraron o seu interese en asociarse.
Fonte: Fátima Missionária
A Secretaría Xeral de Política Lingüística e a Dirección Xeral de Xuventude e Voluntariado propoñen para este verán un programa de dinamización lingüística dirixido a fomentar o uso do galego entre a mocidade a través dos campamentos que organiza a Xunta de Galicia.
Fonte: Xunta de Galicia
Un total de vinte e cinco profesores de todo o país realizou un curso inicial de lingua de signos organizado pola Unidade de Necesidades Educativas Especiais do Ministerio de Educación e o Grupo de Apoio aos Xordos.
Fonte: Kaieteur News
O vicerreitor de Relacións Internacionais e Institucionais da Universidade de León (ULE), José Luís Chamosa, manifestou que a formación en idiomas do persoal administrativo e de servizos da institución académica é "o gran reto” para avanzar na internacionalización e na mobilidade.
Fonte: 20 minutos
A Confederación Estatal de Persoas Xordas esixiu información accesible en servizos sanitarios tales como os referidos á saúde reprodutiva e aos procesos de cambio de sexo, onde a lingua de signos e os apoios á comunicación oral, din, están ausentes.
Fonte: Diario Siglo XXI
O Diario Oficial da Unión Europea adoptará o Acordo Ortográfico para a lingua portuguesa a partir de xaneiro de 2012, segundo adiantou o responsable do idioma na Dirección Xeral de Tradución da Comisión Europea.
Fonte: Expresso
Subscríbase ao boletín
