Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Mellor formación para o persoal docente e un cambio normativo que permita esixir ao profesorado a capacitación para impartir clases nun idioma estranxeiro. Son dúas das medidas que a Consellería de Educación considera fundamentais para desenvolver o novo modelo de ensino trilingüe na Comunidade Valenciana.
Fonte: Las Provincias
No estado de Luisiana, nos Estados Unidos de América, hai unha demanda cada vez maior de ensino dunha segunda lingua, a medida que as linguas diferentes ao inglés acadan unha maior presenza nos EUA. Aínda que a demanda de lingua española é aínda moi alta, agora as familias de Luisiana solicitan cada vez máis ensino en francés para os seus fillos, co fin de que estes teñan máis oportunidades de éxito no futuro.
Fonte: Associated Press
A nova Lei de linguas de Sudáfrica afianzará o multilingüismo, tal como se establece na constitución, por medio de medidas para "elevar o status e promover" as linguas de orixe africana nos departamentos gobernamentais.
Fonte: Daily News
O presidente da Lusa (Axencia de Noticias de Portugal) propón a creación dunha axencia internacional de noticias en lingua portuguesa que será un importante instrumento de información para un dos idiomas máis falados do mundo.
Fonte: SIC Notícias
Unha vez máis, os dereitos dos falantes de asturiano vense golpeados nunhas eleccións. A Xunta Electoral provincial nega o uso das papeletas redactadas en asturiano impresas pola formación Andecha Astur.
Fonte: Asturnews
O Goberno vasco asinou un convenio de colaboración co Centro Cultural-Euskal Etxea de Barcelona polo que concederá unha subvención de 22 000 euros ao centro para asegurar o ensino e a aprendizaxe do éuscaro na cidade catalá.
Fonte: Telecinco
A Fundación Círculo Balear aplaudiu a decisión de IB3 de incluír as dúas linguas oficiais de Baleares (español e catalán) na programación da televisión autonómica.
Fonte: ABC
Os lectorados e centros de estudos galegos cos que conta a Secretaría Xeral de Política Lingüística en universidades de todo o mundo realizan numerosas actividades durante o curso académico para dar a coñecer fóra de Galicia a lingua, a literatura e a cultura galegas.
Fonte: Xunta de Galicia
Alfonso Daniel Rodríguez Castelao, Lois Pereiro e Xosé Neira Vilas están a percorrer Galicia a través de tres exposicións coas que a Secretaría Xeral de Política Lingüística e a Dirección Xeral do Libro, Bibliotecas e Arquivos pretenden difundir a vida e a obra destes recoñecidos escritores da literatura galega.
Fonte: Xunta de Galicia
Xa está dispoñible unha nova aplicación para coñecer mellor os verbos galegos e as súas variantes: ConxuGalego. Trátase dunha ferramenta que nos permite, co emprego dun dispositivo con Android, introducir o infinitivo de calquera verbo en galego, ben sexa regular ou irregular, e obter a súa conxugación en todas as súas diferentes formas.
Fonte: Código Cero
Subscríbase ao boletín
