Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O número de alumnos de ensino primario que fala galés con fluidez non cambiou practicamente tras 23 anos, segundo o censo escolar. As cifras máis recentes facilitadas polo Goberno de Gales para o curso 2009-2010 reflicten que 14684 alumnos de cinco ou máis anos falan galés con fluidez na casa, o que representa o 7,6 %.
Fonte: Daily Post
O Goberno vasco creará a través dunha norma o Rexistro Unificado de Certificados e Títulos de Éuscaro (RUTCE) que expiden ou xestionan diferentes organismos e administracións.
Fonte: Diario Vasco
O Xulgado Contencioso-Administrativo número 2 de Pontevedra condena a Deputación provincial “ao exacto cumprimento da ordenanza referida coa íntegra publicación en galego do Boletín Oficial da Provincia (BOP), tanto no referido ao formato (...) como aos textos propios da administración provincial”.
Fonte: Xornal de Galicia
O comisario para as linguas de Canadá afirma que o Goberno federal está contratando "compradores secretos" para comprobar se os negocios de Ottawa ofrecen os seus servizos nas dúas linguas oficiais. Os compradores, pagados cos cartos dos contribuíntes, verificarán como ofrecen os seus servizos en francés os restaurantes, os hoteis e os servizos públicos.
Fonte: Ottawa CTV
Ibaimusic.com reúne por primeira vez nun portal de internet toda a música feita en Euskadi, tanto en éuscaro coma en castelán, para a súa descarga.
Fonte: Diario Vasco
Os departamentos de Filoloxía Catalá e Lingüística Xeral da Universidade das Illas Baleares fixeron público un manifesto no que expresan a súa oposición ao peche de Radiotelevisión de Mallorca e advirten ao Consell que ten a obriga de cumprir coa Lei de normalización lingüística, que recolle o deber da Administración de promover o coñecemento e o desenvolvemento da lingua e cultura catalás nos medios de comunicación.
Fonte: Telecinco
O idioma galego ocupaba un importante espazo nas páxinas de Xornal de Galicia, que combinaba galego e castelán nas súas informacións. O peche deste periódico vén así sumarse á desaparición de Galicia Hoxe e doutros medios de comunicación co galego como lingua vehicular.
Fonte: Radio Obradoiro
O galego atópase entre o 2,4 % das linguas máis faladas do mundo. Supera o millón de falantes, como só 389 do total estimado de 6633 que se poden atopar no planeta. Fronte á moi asumida idea da homoxeneidade que os estados europeos propagaron, a diversidade lingüística é a realidade.
Fonte: El Mundo
Moita xente ignora os seus dereitos lingüísticos e non hai consciencia de que son as administracións as responsables de os facer cumprir. Estes son algúns dos apuntamentos que se extraen do documento co que se pretenden elaborar as conclusións do recente Curso de Dinamización Lingüística (Re)pensando o discurso que se celebrou en Carballo o pasado mes de xullo.
Fonte: Culturagalega.org
A directora executiva do Consello de Arte de Samoa Americana, Leala Pili, anima os pais a falar samoano na casa para mantelo vivo. Teme que se perda a lingua se os pais non lles falan aos seus fillos na súa lingua materna na casa.
Subscríbase ao boletín
