Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O director do Instituto Castelán e Leonés da Lingua, Gonzalo Santonja, e o reitor da Universidade de Burgos, Alfonso Murillo, asinaron un convenio de colaboración para a creación dunha bolsa de emprego destinada a profesores de español para estranxeiros.
Fonte: Europa Press
Expertos chegados de todos os puntos do territorio federal de Nunavut (Canadá) reuníronse en Iqaluit para debater acerca do espiñoso problema ao que lingüistas e educadores se levan enfrontado durante máis de medio século: como crear unha norma da lingua inuit que poida ser comprendida en todas as rexións do territorio.
Fonte: The Vancouver Sun
As autoridades chinesas prevén a posta en marcha do primeiro exame de nivel para certos estudantes e traballadores da lingua da etnia zhuang, a segunda maior do país tras os Han. A Comisión Estatal de Asuntos Étnicos afirmou que a medida ten por obxecto promover o uso desta lingua que, a diferenza doutras linguas de grupos étnicos minoritarios, segue a ser de uso corrente e estendido.
Fonte: People's Daily Online
Un grupo de arredor de 200 estudantes de lingua irlandesa congregouse na sede do partido Fine Gael para protestar contra a iniciativa que aspira a converter o irlandés en lingua optativa no ensino. Os manifestantes cubriron a súa boca con cinta adhesiva nun acto simbólico contra a proposta que consideran "totalmente prexudicial para a lingua".
Fonte: Irishtimes
Co desexo de adecuar a toponimia á Lei de normalización lingüística, o Concello de Porto do Son entende que o máis apropiado é non limitarse unicamente aos nomes de aldeas e lugares, senón tamén estendelo ás igrexas.
Fonte: La Voz de Galicia
Música, moita maxia e múltiples obradoiros. Esta é a proposta do programa de dinamización lingüística Bocaberta para facer gozar os rapaces e rapazas dos 3 aos 18 anos nos próximos días.
Fonte: Xunta de Galicia
Xunta Moza, a sección de xuventude da Xunta pola Defensa de la Llingua Asturiana, convoca a segunda edición do concurso literario “Declara o teu amor pola lingua”, con motivo do Día Internacional da Lingua Materna.
Fonte: 20 minutos
Grazas a un único programa lingüístico os alumnos dalgunhas escolas públicas de Portland, no estado estadounidense de Oregón, están inmersos na lingua xaponesa desde a gardería ata o ensino secundario. A intención dos programas de inmersión lingüística é que os estudantes estean rodeados da lingua e isto resulta beneficioso para eles, xa que tanto o seu rendemento académico, como a súa habilidade para aprender unha terceira ou unha cuarta lingua son maiores.
Fonte: WRAL.com
Galego, 30; castelán, 66. Tal sería o titular redondo para ilustrar como se reparte o uso dos idiomas na docencia da Universidade de Santiago de Compostela, tal como informa un documento difundido en O Cartafol Dixital, publicación do Servizo de Normalización Lingüística da Universidade de Santiago.
Fonte: Galicia Hoxe
A Secretaría Xeral de Política Lingüística, en colaboración coa Escola Galega de Administración Pública (EGAP), vén de convocar cursos de linguaxe administrativa galega para o persoal da Administración pública de Galicia.
Fonte: Xunta de Galicia
Subscríbase ao boletín
