Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Consellería de Educación e Ordenación Universitaria fixo pública a resolución da convocatoria para a realización de proxectos de innovación en dinamización lingüística en centros de titularidade desta consellería, para desenvolver no curso académico 2010-2011.
Fonte: Xunta de Galicia
Os alumnos da Universidade de Dhaka, en Bangladesh, terán clases de lingua e cultura españolas impartidas por profesores das universidades de Santiago de Compostela e da Coruña a través da Cátedra Inditex de Español.
Fonte: La Voz de Galicia
As bolsas facilitarán información financeira en liña en 16 linguas oficiais da India a partir de abril de 2011, o que lles dará aos investidores acceso a información financeira na lingua da súa preferencia.
Fonte: The Economic Times
Diferentes colectivos galegos demandan a inclusión do galego como lingua preferente na configuración dos milleiros de ultraportátiles que se distribúen entre os alumnos de Galicia.
Fonte: Código Cero
Desde a Universidade de Almería estase facendo nos últimos anos unha aposta clara pola súa internacionalización e promoción a través das novas tecnoloxías. Por iso, unha das accións que levou a cabo a Universidade foi a tradución dunha gran parte da súa web a chinés.
Fonte: Teleprensa
A Secretaría Xeral de Política Lingüística vén de poñer en marcha o boletín electrónico de Bocaberta, unha ferramenta a través da que facilitará semanalmente toda a información sobre este programa que busca promover o uso do galego entre os rapaces e rapazas de 3 a 18 anos.
Fonte: Xunta de Galicia
En virtude dun convenio, a Fundación Mintzola vai promover nos colexios de Tolosa, en colaboración cos profesores, un ambicioso proxecto piloto que se estenderá ao longo dos catro próximos cursos escolares. O obxectivo tanxible é dar cunha metodoloxía adecuada que garanta un maior e mellor uso do éuscaro entre os escolares.
Fonte: Diario Vasco
O Boletín Oficial de Aragón publicou a listaxe dos quince membros que conformarán o Consello Superior de Linguas de Aragón. Estas persoas, elixidas polo Goberno autonómico, as Cortes e a Universidade de Zaragoza, deben ser seleccionadas entre filólogos, xuristas e destacadas personalidades da investigación lingüística.
Fonte: Aragón Digital
En Australia o uso das linguas indíxenas reduciuse a un ritmo alarmante, ao pasar de centenares hai só 200 anos, no tempo da colonización europea, a arredor de 20 na actualidade. Persoas como Injie, de 48 anos de idade, forman parte dun programa que tenta parar a desaparición das linguas mediante a formación de profesores que llelas poderán transmitir aos seus alumnos.
Fonte: ABS-CBN
O Concello de Vilanova de Magalona terá que retirar os rótulos en occitano que anuncian a entrada ao municipio. Un tribunal de Montpellier deulle a razón a unha asociación que solicitara a retirada de tres carteis que indican o nome da localidade nesta lingua, a carón doutros en que figura a denominación francesa: Villeneuve-lès-Maguelone.
Fonte: Avui
Subscríbase ao boletín
