Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O hotel Gwesty Carreg Môn, en Anglesey, no norte de Gales, emitiu unha norma pola que prohibe falar galés ao persoal de cociña porque o seu principal responsable non fala nin entende esta lingua. A dirección do hotel afirma que tomou esta decisión "unicamente por razóns de seguridade" para garantir o bo funcionamento do servizo de restauración.
Fonte: Daily Post
Un estudo revelou que o árabe é, despois do inglés, a lingua máis falada pola xente nova en Australia. Un de cada oito nenos multilingües emprega esta lingua no ámbito familiar.
Fonte: Gulfnews
Un recente estudo indica que as 6.000 linguas modernas do mundo poderían ter descendido dunha única lingua ancestral falada por humanos prehistóricos de África hai entre 50.000 e 70.000 anos.
Fonte: The Wall Street Journal
Segundo a opinión dunha experta lingüista, os pais e nais falantes de inglés que decidan aprender galés son fundamentais para a supervivencia e crecemento da lingua galesa. O último estudo oficial sobre o uso do galés é o do censo do 2001 que mostra que a porcentaxe de persoas que poden falar a lingua galesa pasou dun 18,7 % a un 20,8 % na última década. Porén, existe preocupación de que a lingua non se empregue amplamente no día a día.
A Mesa pola Normalización Lingüística uniuse á queixa de varios colectivos e mais da xornalista Julia Otero polo nulo uso do galego por parte do centro comercial Marineda City.
Fonte: Xornal.com
Un recente estudo sobre a aprendizaxe de idiomas realizado en 150 países perfila os españois coma os cidadáns que máis invisten en aprender unha segunda ou terceira lingua. Porén, isto non os coloca á cabeza do multilingüismo.
Fonte: Informativos Telecinco
O Goberno dá por finalizada a polémica sobre a obrigatoriedade de falar as linguas oficiais para os estranxeiros que teñan que renovar os seus permisos de residencia. O último borrador do regulamento da Lei de estranxeiría cambia a esixencia do “coñecemento” destas pola da “aprendizaxe”, valorando o “esforzo” en lugar dos resultados obtidos.
Fonte: Público
O secretario xeral de Política Lingüística, Anxo Lorenzo, incidiu no “traballo coordinado e colaborativo cos concellos para impulsar o fomento do uso social do galego desde o ámbito local”.
Fonte: Xunta de Galicia
Prolingua, a plataforma "apartidaria e plural" en defensa da lingua galega, vén de entregar no Rexistro Xeral da Xunta unha "carta aberta" dirixida ao presidente, Alberto Núñez Feijóo, co obxectivo de reclamarlle que a Lei de normalización lingüística de 1983 non sexa reformada.
Fonte: Xornal.com
O Consello de Mallorca modificou o regulamento de uso do catalán no seu ámbito de competencia para promover o emprego da lingua propia entre as empresas e entidades concesionarias da institución e para actualizar os requirimentos lingüísticos de acceso para os traballadores insulares.
Fonte: ABC
Subscríbase ao boletín
