Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Dirección Xeral de Tráfico (DXT) comprometeuse a adaptar o manual de tráfico á lingua de signos española, así como un glosario específico co obxectivo de facilitar o acceso ao permiso de conducir á comunidade de persoas xordas, segundo informou a Confederación Nacional de Xordos (CNSE).
Fonte: Europa Press
O Senado deu un paso histórico coa estrea do uso das linguas cooficiais na Cámara que, malia o seu carácter territorial, ata agora vetaba esta posibilidade aos seus representantes.
Fonte: Público
A Fundación rioxana San Millán de la Cogolla e a Universidade do País Vasco asinarán un convenio para investigar e difundir o patrimonio emilianense referido ao pasado común de ambos os territorios e á historia das linguas castelá e vasca.
Fonte: ABC
A Secretaría Xeral de Política Lingüística convoca axudas para fomentar o uso do galego desde o ámbito educativo durante o curso escolar 2010-2011. A secretaría xeral destina 50.700 euros para a realización de proxectos de fomento do galego nos centros de ensino de titularidade privada.
Fonte: Xunta de Galicia
Un informe da Organización das Nacións Unidas que analiza a situación dos dereitos humanos dos pobos saami en Suecia, Finlandia e Noruega reclama aos estados nórdicos que destinen máis financiamento aos parlamentos destes pobos para promover o coñecemento xeral das poboacións indíxenas do Ártico, así como a súa lingua e cultura.
Fonte: EurActiv
A Universidade Federal de Grande Dourados no Brasil participa nun proxecto en colaboración coa Organización Internacional do Traballo (OIT) que ten como obxectivo traducir documentos relativos aos dereitos indíxenas ás linguas guaraní-kaiowá e terena.
Fonte: MS JÁ Portal de Notícias
A Academia Valenciana da Lingua (AVL) destacou a necesidade de impulsar os medios de comunicación en valenciano, especialmente Televisión Valenciana, para conseguir que esta lingua gañe “un espazo máis amplo no ámbito social”.
Fonte: ABC
O mercado catalán expresa unha sensibilidade para recibir produtos, servizos e a comunicación na lingua propia por parte das empresas, mesmo coa valoración positiva de persoas que orixinariamente non falan catalán, que consideran un acto de normalidade a presenza desta lingua no mercado. Malia isto, existe un fallo no mercado, xa que a oferta de produtos en catalán por parte da iniciativa privada é insuficiente, tendo en conta as características lingüísticas da poboación e as súas preferencias.
O programa Bocaberta da Secretaría Xeral de Política Lingüística organiza múltiples actividades nos próximos días dirixidas a promover o uso do galego entre os máis novos. O programa levará esta semana actividades para gozar a través da lingua galega a 24 concellos de toda Galicia.
Fonte: Xunta de Galicia
O último censo mostra que máis mozos e mozas de Singapur falan inglés na casa, o que resulta preocupante polo impacto que isto pode ter na aprendizaxe da lingua materna nas escolas. Entre os malaios de idades comprendidas entre os 5 e os 14 anos, o 26 % fala inglés na casa fronte ao 9,4 % de hai dez anos.
Fonte: Channel News Asia
Subscríbase ao boletín
