Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O colectivo Fala Ceibe do Bierzo informa de que a desaparición da televisión analóxica impedirá ver as actuais emisións da Televisión Pública Galega (TVG) no Bierzo. Durante anos os bercianos puideron gozar da programación en lingua galega desta canle, o único medio de comunicación televisivo que os galegofalantes desta zona leonesa podían ver neste idioma, o que serviu para fomentar e prestixiar a lingua.
Fonte: O Bierzo Ceibe
A asesora educativa da Federación de Persoas Xordas de Cantabria, Cristina Assal, destacou, durante a celebración do curso "Comunicación básica en lingua de signos española" que se celebra en Cantabria, o papel de factores como a expresión facial, o movemento corporal ou a vocalización na lingua de signos.
Fonte: El Correo Gallego
Desde hai anos, practicamente coa posta en marcha do portal en internet de turismo rural da Junta de Castilla y León os empresarios do sector apuntaron a necesidade de divulgar con eficacia esta ferramenta. Neste aspecto, o presidente de Acaltur, Javier Herrera, lamenta que as páxinas web de turismo rural da rexión apenas «están en inglés», por non falar doutras linguas.
Fonte: ABC
A Consellería de Cultura e Turismo da Xunta de Galicia colaborará coa rede de bibliotecas da cidade de Bos Aires na creación dunha sección do libro galego, co fin de difundir e promover o idioma e a literatura da comunidade en Arxentina.
Fonte: Europa Press
Os cerebros dos nenos bilingües deben realizar moitos menos esforzos para efectuar cálculos simples que os dos nenos que dominan unha soa lingua, segundo a Vrije Universiteit Brussel (Universidade Libre de Bruxelas).
Fonte: RTL Info
Anunciárase que o guaraní sería unha das linguas oficiais do Mercosur, xunto co español e o portugués. Porén, os mandatarios dos países membros do bloque non rubricaron a resolución aprobada polo Parlasur (Parlamento do Mercosur), o pasado 28 de abril, que elevaría efectivamente o guaraní ao rango de idioma oficial do Mercosur.
Fonte: Última Hora
O Fórum Metropolitano da Coruña acolle as II Xornadas de Mangalego co obxectivo de promover a participación da xuventude e achegar o idioma galego ás novas xeracións a través de series e películas manga.
Fonte: Galicia Hoxe
Hai dous anos, o Padroado de Éuscaro de San Sebastián comezou a ofertar cursos específicos para comerciantes e hostaleiros. O obxectivo era que puidesen atender a súa clientela nesta lingua, pero tamén que fosen conscientes do valor engadido que o éuscaro supón para os seus negocios e a calidade do servizo. Desde entón, douscentos comerciantes pasaron por estes cursos.
Fonte: Diario Vasco
A metade dos concellos de Asturias concluíu xa a recuperación dos seus topónimos tradicionais. A estes 39 municipios, que finalizaron a revisión da súa toponimia, súmanse outros 20 que teñen aberto o proceso para restaurar os nomes populares e tradicionais do seu contorno.
Fonte: La Nueva España
O Concello de Lena continúa co seu compromiso en favor do uso do asturiano no municipio e, neste sentido, desde a concellería de Política Lingüística, dirixida por David Suárez, xa se está a traballar en novos proxectos que se desenvolverán ao longo dos vindeiros meses.
Fonte: La Nueva España
Subscríbase ao boletín
