Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Generalitat de Catalunya e 14 concellos puxeron en marcha un plan piloto para ensinarlles catalán a nenos e nenas de orixe estranxeira que o precisen para garantir a súa incorporación ao sistema educativo e á sociedade. As clases formarán parte da oferta de verán de entidades como os centros municipais e incluirán actividades de lecer.
Fonte: Generalitat de Catalunya
A conselleira de Educación e Ciencia, María Ángeles García, anunciou que, cando se cumpren dous anos de lexislatura, superouse o compromiso do presidente rexional, José María Barreda, de triplicar o número de centros bilingües en Castela-A Mancha.
Fonte: Lanzadigital
A cidade macedonia de Gostivar comezará a utilizar o turco como lingua oficial, ademais do macedonio e o albanés. Un anteproxecto de lei presentado por membros do Partido Democrático Turco de Macedonia foi aceptado por unanimidade polo Concello de Gostivar e a lei fixo o turco oficial dentro dos límites da cidade de Gostivar.
Fonte: TurkNet
O secretario xeral de Política Lingüística, Anxo Lorenzo, afirmou que desde Política Lingüística da Consellería de Educación e Ordenación Universitaria están “completamente decididos a potenciar a lingua galega a través dos novos recursos tecnolóxicos”.
Fonte: Xunta de Galicia
Un proxecto de lei pendente no Congreso dos Estados Unidos podería aumentar considerablemente as clases de chinés mandarín para estudantes estadounidenses. A medida, a Lei de compromiso dos Estados Unidos coa lingua chinesa, concederíalles axudas en réxime de concorrencia ás escolas para "establecer, ampliar ou mellorar" as clases de lingua e cultura chinesas.
Fonte: Examiner
O primeiro informativo en lingua leonesa que emite a televisión denomínase “Xornal Informativu en Llingua Llïonesa” e conta desde o mes de xullo cun espazo propio en Televisión Castilla y León. O informativo emitirase os sábados ás 20.15 horas e os luns ás 10.30 horas pola canle número 8 e terá dez minutos de duración.
Fonte: Leonoticias
O secretario xeral de Política Lingüística, Anxo Lorenzo, participou no concello coruñés de Carballo na inauguración do V Curso de Verán sobre Dinamización Lingüística ‘Traballando en Lingua’, no que se analizarán o compromiso e os argumentos para a defensa e promoción do galego.
Fonte: Xunta de Galicia
O secretario xeral de Política Lingüística, Anxo Lorenzo, recibiu os responsables da política lingüística das universidades galegas. Na reunión tratáronse os principais proxectos que se están a desenvolver nos servizos de normalización universitarios de Santiago, A Coruña e Vigo.
Fonte: Xunta de Galicia
Algúns lingüistas de Finlandia están preocupados pola introdución de palabras inglesas na lingua finlandesa. Temen que poida ofender os finlandeses que non dominan o inglés e crear desigualdades, especialmente nos servizos públicos.
Fonte: YLE
Os curas queren apoiar o Manifesto a prol da convivencia lingüística e da igualdade de dereitos para o galego, que representa que "o pobo galego ten dereito a que a súa lingua propia orixinaria sexa oficial para todos os efectos no seu ámbito territorial, e que os usuarios do galego deben gozar no seu territorio do mesmo status legal que o castelán ten no seu".
Fonte: A Nosa Terra
Subscríbase ao boletín
