Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Durante todo o mes de maio a cidade da Coruña encherase de diversas actividades para que pequenos/as e mozos/as poidan gozar da lingua galega. Unha carpa móbil percorrerá os diversos barrios con animación de rúa, concertos, teatro, animación á lectura, exposición de materiais etc.
Fonte: CTNL
Os organizadores dos Xogos Olímpicos de Inverno de Vancouver, que se celebrarán no ano 2010, solicitan fondos suplementarios do Goberno federal para financiar o uso do francés durante a celebración destes Xogos.
Fonte: The Canadian Press
Os estudantes poderán escoller indistintamente entre castelán ou galego para dirixirse aos profesores e facer exames coas excepcións das materias de Lingua Española e Lingua Galega.
Fonte: La Opinión de A Coruña
A Generalitat de Catalunya puxo en funcionamento un portal en internet para facilitar a integración dos inmigrantes, que inclúe información básica sobre a sociedade catalá e a súa lexislación, traducida a dez linguas diferentes.
Fonte: 20 minutos
Mentres o galego segue avanzando no eido do software libre, segue esquecido nos programas propietarios. É o caso, por exemplo, do lector de PDF máis estendido, o Adobe Reader. A súa última versión, a 9.1, ten localizacións ao catalán e ao éuscaro, mais non en lingua galega.
Fonte: Vieiros
Representantes de Chunta Aragonesista (CHA) reuníronse en Bruxelas con membros do gabinete do comisario de Multilingüismo, Leonard Orban, e co eurodeputado de Eusko Alkartasuna, Mikel Irujo, para denunciar o "abandono" do aragonés e do catalán por parte do Goberno de Aragón.
Fonte: Europa Press
A Mesa pola Normalización Lingüística organiza por segundo ano consecutivo o concurso de vídeos 'Mobilízate pola Lingua', co que pretende que rapaces de toda Galicia graven cos seus teléfonos móbiles situacións da súa vida cotiá nas que teñen problemas para poder expresarse en galego.
Fonte: Galiciaé
Poucos días despois da celebración do XXI Concerto pola Oficialidade, os organizadores fan balance do resultado de asistencia, que consideran un éxito, pois calculan que asistiron máis de 2000 persoas.
Fonte: Asturnews
O mirandés, a segunda lingua oficial de Portugal, está a gañar cada vez máis adeptos. En 1999 foi recoñecida como Lingua Oficial Rexional e, no mesmo ano, foi tamén publicada a Convención Ortográfica preparada por especialistas das Facultades de Lisboa e Coimbra e por un conxunto de mirandeses.
Fonte: IOL Diário
Científicos da Universidade de Anglia do Leste crearon ordenadores capaces de ler os labios que poden distinguir linguas diferentes. Estes ordenadores xa están en proceso de desenvolvemento, pero trátase da primeira vez que se lles "ensinou" a recoñecer linguas distintas.
Fonte: University of East Anglia
Subscríbase ao boletín
