O InformeCAT 2026 advirte de que o hábito de abandonar o catalán nas interaccións con persoas descoñecidas dificulta a integración lingüística e debilita o seu papel como lingua de cohesión social. Malia este retroceso, o estudo salienta que o catalán conserva un elevado prestixio social, gaña presenza no ámbito dixital e continúa a rexistrar avances institucionais que poden contribuír a fortalecer o seu uso.

A Universidade de Santiago concedeu por unanimidade o IX Premio Luís Porteiro Garea a Antón Santamarina, en recoñecemento á súa decisiva contribución ao estudo, á codificación e á normalización da lingua galega. O xurado salientou unha traxectoria investigadora de referencia en ámbitos como a lexicografía, a dialectoloxía, a onomástica ou a historia da lingua, así como o seu labor á fronte de proxectos fundamentais para o coñecemento e a difusión do galego.

Investigadores de universidades de Gales, Escocia, Irlanda e Irlanda do Norte impulsan un proxecto para identificar os factores que favorecen a aprendizaxe de linguas e reverter o descenso do seu estudo. A investigación analizará o papel das escolas, o profesorado, as políticas públicas e as novas tecnoloxías, como a intelixencia artificial e a realidade virtual, co obxectivo de formular recomendacións que impulsen unha cultura lingüística máis sólida e diversa.

O Departamento de Economía de Irlanda do Norte iniciou unha consulta pública sobre a súa nova política para a promoción da lingua irlandesa. O proceso permitirá recoller opinións da cidadanía e das organizacións interesadas para definir medidas que garantan o uso e a presenza do irlandés nos servizos e na actividade do departamento.

Fonte: Department for the Economy / An Roinn Geilleagair