O Concello de Tremp puxo en marcha unha campaña para reforzar o uso do catalán no comercio local tras detectar carencias na súa presenza, especialmente en negocios con trato directo coa clientela. A iniciativa ofrece formación práctica ao persoal de bares, restaurantes e tendas para mellorar a comunicación oral e escrita, así como apoio na revisión de cartas, carteis e contidos para redes sociais.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
14 de abril de 2026
14 de abril de 2026
A Praza de San Marcos acollerá o 15 de abril a inauguración de A lingua do futuro / O futuro da lingua, unha exposición fotográfica de Alba Díaz que propón unha reflexión visual sobre a situación sociolingüística de Galicia coincidindo co Día Mundial da Arte. A mostra retrata unha xeración nova que, malia medrar nun contexto de retroceso do galego, conserva a lingua como vehículo principal.
14 de abril de 2026
A presidenta do Instituto de Estudo Cataláns proporá que a Sección Filolóxica estude unha denominación común para a lingua en todos os territorios do seu dominio, coa intención de reforzar unha identificación compartida en contextos externos e académicos. A responsable da institución defende que a fórmula «lingua catalá» podería cumprir esa función sen invalidar as denominacións propias de cada territorio no uso interno.
13 de abril de 2026
O Instituto Camões organiza, en colaboración con seis institucións de ensino superior, a sétima edición do curso de verán de lingua e cultura portuguesas, que se desenvolverá en formato dixital entre xuño e xullo de 2026. As inscricións estarán abertas do 5 ao 18 de maio, e o curso comezará o 29 de xuño, cunha duración de catro semanas. Está dirixido a alumnado de todos os niveis (de A1 a C2) e combina formación lingüística e cultural.
Fonte: Bom dia
13 de abril de 2026
As solicitudes para varios niveis do exame oficial de lingua xaponesa, necesario para estudar ou traballar no Xapón, pecharon antes do previsto polo forte aumento da demanda. A organización adiantou o peche das inscricións por falta de espazos, deixando fóra moitas persoas aspirantes.
Fonte: Japan Wire
13 de abril de 2026
Case un de cada catro libros editados en Cataluña foi publicado en catalán en 2024, un exercicio no que o sector amosou sinais de estabilidade na produción e, ao tempo, rexistrou unha facturación de récord. A edición en catalán mantén un peso semellante tanto no conxunto da oferta como no libro en papel, mentres o catálogo dispoñible segue a medrar con forza.
Fonte: Diari de la Llengua
13 de abril de 2026
O Proxecto Rossinyol da Universidade de Xirona celebrou vinte anos de traxectoria promovendo a integración lingüística e a cohesión social entre alumnado de orixe estranxeira. O programa, que vincula estudantes universitarios con crianzas e adolescentes mediante encontros semanais, consolidouse como unha referencia ao ter chegado a vinte municipios e a milleiros de participantes. As institucións salientan o seu papel na aprendizaxe do catalán e na creación de vínculos comunitarios que favorecen a igualdade de oportunidades.
10 de abril de 2026
Un estudo publicado en Nature Human Behaviour revela que máis de 1.700 linguas presentan normas gramaticais comúns, especialmente na orde das palabras e nas estruturas das oracións. Os investigadores conclúen que as linguas non evolucionan ao chou, senón seguindo patróns previsibles condicionados por factores cognitivos e comunicativos compartidos.
Fonte: Diari de la Llengua
10 de abril de 2026
Investigadores dos Emiratos Árabes Unidos crearon unha aplicación baseada en intelixencia artificial que permite traducir en tempo real entre lingua de signos e texto ou fala. A ferramenta facilita a comunicación entre persoas con discapacidade auditiva de distintos países e busca mellorar a inclusión en ámbitos como a educación e o traballo.
Fonte: TV Brics
10 de abril de 2026
O Goberno de Andorra puxo en marcha unha campaña para fomentar o uso do catalán en bares, cafetarías e tendas de alimentación mediante materiais con vocabulario específico. A iniciativa pretende reforzar a presenza da lingua propia no ámbito comercial e promover o seu valor cultural e identitario.
Fonte: Diari de la Llengua
Boletín
Subscríbase ao boletín
