Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Desde que o mercado de traballo é máis aberto en Suíza, os alsacianos atopan cada vez máis competencia cos alemáns e os asalariados de Europa do Este. A causa parece ser que a xuventude alsaciana é menos políglota que os seus pais.
Fonte: Eurominority
Velar polo cumprimento do decreto do galego para avanzar dun xeito real na normalización lingüística no ensino será un dos principais cabalos de batalla da CIG-Ensino. Con este fin, pediron a creación dunha dirección ou dunha subdirección de Educación que coordine o uso da lingua do país nos centros educativos.
Fonte: Vieiros
O conselleiro de Vicepresidencia da Generalitat de Catalunya, Josep-Lluís Carod-Rovira, anunciou que Política Lingüística da Generalitat levará a cabo proximamente unha campaña dirixida aos catalanofalantes, instándoos a non cambiar de lingua cando alguén se lles dirixa en castelán.
Fonte: Racó Català
O novo decreto que regula o segundo ciclo de educación infantil (de tres a seis anos) e que aprobou o Consello Executivo da Generalitat inclúe, entre as súas principais novidades, a introdución do uso oral dunha lingua estranxeira no último curso desta etapa educativa, e tamén as novas tecnoloxías da información e da comunicación (TIC) na área de lingua.
Fonte: Avui
Falarase da presenza do galego na rede, a través de blogs, contidos culturais, xogos etc., e da recepción de información en galego a través da internet.
Fonte: XornalGalicia
O decano da Facultade de Filoloxía da Universidade de Oviedo, José Antonio Martínez, nomeado polo reitor tras a dimisión da anterior titular espera que en novembro quede aprobado o novo plan de estudos, que incluiría un «minor» de llingua asturiana.
Fonte: La Nueva España
O 19,3% dos alumnos estudará no modelo A, en castelán coa lingua vasca como materia; o 23,2% farao no B, bilingüe; e o 57,5% recibirá as clases en éuscaro, na liña D.
Fonte: Diario Vasco
Xa está dispoñible a primeira versión candidata de OpenOffice.org 3.0, o paquete ofimático aberto máis coñecido, en galego. Hai que lembrar que este software foi traducido á nosa lingua no último encontro Xuventude Galiza Net coa coordinación de Mancomún.
Fonte: Vieiros
Segundo Patxi Baztarrika, viceconselleiro de Política Lingüística do Goberno vasco, é a primeira vez que unha campaña en favor do éuscaro obtén unha resonancia tan masiva pois a campaña Ukan 2008 "pixka bat es mucho" superou os ámbitos habituais da publicidade e chegou a toda a sociedade.
Fonte: Euskadi.net
O modelo lingüístico das Illas Feroe ten algo en común con calquera catalán, máis que ningún outro en Europa. Entre outras cousas, paradoxalmente os feroeses estudan máis horas á semana de español, é dicir, unha lingua estranxeira, ca de danés, a oficial do seu estado.
Fonte: El Mundo
Subscríbase ao boletín
