Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Máis dun cento de comunicacións presentáronse no LVII Congreso Internacional da Asociación Europea de Profesores de Español, AEPE, unha cita que ten lugar na Facultade de Filoloxía e Tradución da Universidade de Vigo e que reúne arredor de 130 docentes chegados de máis dunha vintena de países.
Fonte: DUVI
A nova xestora das políticas públicas portuguesas para a cooperación, desenvolvemento e promoción da lingua portuguesa, Ana Paula Fernandes, anunciou que asume o liderado do Camões, Instituto da Cooperación e da Lingua cunha "responsabilidade engadida".
Fonte: RTP
O Goberno de Portugal anunciou que o orzamento do Camões, Instituto da Cooperación e da Lingua, está a ser executado segundo o previsto e mesmo con avances significativos respecto a anos anteriores.
Fonte: RTP
O Departamento de Cultura da Generalitat de Cataluña publicou unha nova partida de axudas para crear máis xogos de mesa en lingua catalá.
Fonte: Generalitat de Catalunya
O Centro de Interpretación do Aragonés do Mosteiro de Casbas de Huesca acolle a exposición Vozes en o zierzo sobre as linguas minorizadas de Aragón. A mostra está organizada pola Dirección Xeral de Política Lingüística do Goberno de Aragón.
Fonte: SER
A actriz e xornalista Nerea Brey recibiu o premio Abrente de Textos Teatrais da Mostra Internacional de Teatro de Ribadavia pola súa obra Manual de patronaxe. Por outra banda, A Panadaría recibiu o premio do público pola súa peza As que limpan.
Fonte: Cultura galega
A Universidade de Santiago de Compostela (USC) e a Real Academia Galega (RAG) clausuraron a trixésimo terceira edición dos cursos de lingua e cultura galegas "Galego sen fronteiras" que contou coa participación de medio cento de estudantes de países de tres continentes.
Fonte: USC
O presidente da República de Suráfrica, Cyril Ramaphosa, asinou en Pretoria a Lei da Lingua de Signos Surafricana que garante o seu recoñecemento como lingua oficial, a décimo segunda do país.
Fonte: TRT
A Asociación de Universidades de Lingua Portuguesa (AULP, polas súas siglas en portugués) convocou a nova edición do Premio Fernão Mendes Pinto que galardoa as teses de doutoramento ou mestrado que contribúan á aproximación das comunidades de lingua portuguesa.
Fonte: Expresso das Ilhas
O filme O Corno, da cineasta vasca Jaione Camborda, será a primeira longametraxe en galego que competirá para a Cuncha de Ouro na sección oficial do Festival de San Sebastián.
Fonte: El Diario
Subscríbase ao boletín
