Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Concello de Portugalete convoca subvencións para promover o uso do éuscaro en rótulos, carteis de interior e contido dixital en comercios, hostalería e servizos. As axudas cobren ata o 100 % do gasto en rótulos (máximo 800 €), un 60-75 % en carteis ou webs (máximos 500-800 €) e a adopción do dominio .eus (ata 30 €).
Fonte: En Portugalete
Un proxecto da Universidade de Aberystwyth investiga a poesía medieval en lingua galesa para analizar como os bardos empregaban a linguaxe do amor, do afecto e do matrimonio ao describiren a súa relación cos seus mecenas. O estudo busca comprender a orixe e evolución desta tradición literaria propia do galés, así como o que revela sobre a lealdade, a identidade, a masculinidade e as relacións de poder na sociedade galesa da Idade Media.
A Cooperativa Árvore do Porto celebra entre xuño e xullo o Mes do Mirandés, unha iniciativa que inclúe exposicións, conferencias e actividades culturais para promover a lingua mirandesa e o patrimonio da Terra de Miranda. O programa pretende achegar esta realidade lingüística ao público urbano e destacar o valor da diversidade cultural en Portugal.
Fonte: Diário de Trás-os-Montes
A versión en galego da norma UNE-EN ISO 14050:2023 sobre xestión ambiental vén de ser publicada por AENOR, que se converte así na novena tradución realizada polo Servizo de Normalización Lingüística da USC. A norma define máis de 350 conceptos fundamentais da serie ISO 14000 e ofrece equivalentes en galego, castelán e inglés, garantindo precisión terminolóxica para empresas, auditores e organismos reguladores.
A Asociación Socio-Pedagóxica Galega convoca unha nova edición do Concurso de relato oral "Tíralle da lingua", destinado á comunidade educativa para fomentar o uso oral do galego no ámbito escolar. As historias poden ser populares, literarias ou de creación propia e terán unha duración máxima de cinco minutos. Na fase final, que se celebrará a finais de novembro, o xurado concederá un primeiro premio de 250 euros por nivel educativo e, se procede, un segundo de 150 euros, con igual contía para os centros dos participantes galardoados.
O Goberno francés e o estado brasileiro do Río de Xaneiro asinaron un acordo de cooperación para fortalecer a presenza da lingua francesa nas escolas públicas estatais. A iniciativa prevé accións de formación para o profesorado, intercambio de recursos educativos e programas destinados a ampliar a aprendizaxe do francés entre o alumnado.
Fonte: Diplomacia businesss
A Comisión Europea considera nun informe sobre España que a obriga de etiquetar produtos en catalán pode aumentar os custos para as empresas e dificultar a integración do mercado europeo. Bruxelas advirte tamén de que as diferenzas normativas entre comunidades autónomas poden crear obstáculos ao comercio.
Fonte: Diari de la Llengua
O Goberno do Chad decidiu que o árabe estándar teña a mesma presenza ca o francés como lingua de ensino e avaliación nas escolas. A medida forma parte dunha reforma con importantes implicacións políticas e sociais, xa que reflicte cambios nas relacións de poder internas e no achegamento do país ao mundo árabe. Expertos advirten, porén, das dificultades para aplicar a reforma debido á escaseza de profesorado e materiais didácticos en árabe.
A Universidade de Deusto e Etxepare Euskal Institutua asinaron un convenio marco para impulsar a promoción e difusión do éuscaro e da cultura vasca nos ámbitos académico, cultural e social. O acordo, vixente durante cinco anos, permitirá organizar actividades formativas e culturais, promover proxectos de investigación e creación, xerar espazos de encontro entre a comunidade universitaria e axentes culturais, e fortalecer a proxección internacional do idioma e da creación vasca.
Preto de 700 persoas participaron en Parlem!, unha iniciativa desenvolvida en Perpiñán e noutras localidades da Cataluña Norte para facilitar o uso do catalán entre falantes, aprendices e persoas que o entenden. Os organizadores destacan que moitas veces se fala en francés con veciños e veciñas da zona porque se descoñece que tamén saben catalán, e consideran que o proxecto contribuíu a dar visibilidade á lingua no espazo público.
Subscríbase ao boletín
