Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Asociación polo Ensino do Catalán (APLEC, polas súas siglas en francés) puxo en marcha unha campaña informativa dirixida ás familias e ao alumnado para promover a elección do catalán nos liceos da Cataluña Norte. A iniciativa inclúe a difusión de materiais e información sobre o dereito a estudar esta lingua, nun contexto no que a súa presenza no ensino secundario é moi limitada.
Fonte: Diari de la Llengua
A Secretaría Xeral da Lingua, dependente da Consellería de Cultura, Lingua e Xuventude, convocou as probas para a obtención dos certificados de lingua galega Celga 1, 2, 3 e 4 no ano 2026. A convocatoria permitirá acreditar oficialmente o nivel de coñecemento do galego.
Fonte: Xuventude
A Viquipèdia en catalán fai 25 anos, polo que se sitúa como unha das primeiras edicións da enciclopedia e a primeira en lingua non inglesa. Na actualidade destaca pola súa alta calidade (cuarta a nivel mundial), con máis de 790 000 artigos, e polo seu papel na normalización e presenza do catalán no ámbito dixital, aínda que o seu uso segue sendo minoritario en comparación con outras versións.
Fonte: Diari de la Llengua
O Cupra Born convértese no primeiro coche europeo en incorporar o galego, ademais do catalán e o éuscaro como linguas dispoñibles no seu sistema de infoentretemento. Esta integración permite que funcións como o GPS, a asistencia á condución ou a información do vehículo se mostren nestas linguas, reforzando a súa presenza no ámbito tecnolóxico e dixital.
Fonte: El Periódico
A Deputación Foral de Áraba e Euskaltzaindia presentaron o estudo Toponimia histórica e contacto vasco-románico, que analiza arredor de 600 topónimos en zonas de contacto entre éuscaro e castelán. A investigación revela a presenza continuada do éuscaro ata polo menos o século XV e destaca o valor da toponimia para reconstruír a evolución e convivencia das linguas na rexión.
O secretario xeral da Lingua, Valentín García, participou na entrega dos galardóns da quinta edición dos Premios Otero Pedrayo para estudantes de Secundaria e Bacharelato e que distinguiu os institutos Ribeira do Louro, do municipio pontevedrés do Porriño, e o Castelao, de Vigo. Así mesmo, recoñeceu o valor dun traballo dun alumno centro Xulián Magariños, do concello coruñés de Negreira, e que será publicado na revista Trasalba.
BBC Studios anunciou o lanzamento dunha versión en francés da canle documental BBC Earth a través da plataforma CANAL+. A nova oferta permitirá ampliar a difusión dos contidos de natureza e ciencia da BBC entre o público francófono, especialmente en países africanos. Esta nova emisión permitirá que millóns de espectadores accedan a contidos de alta calidade sobre o mundo natural e historias humanas extraordinarias.
Fonte: SeñalNews
A Universidade de Liverpool conmemora o centenario do ensino da lingua e da cultura catalás, unha tradición académica de longa traxectoria na institución. Con motivo desta efeméride, organízanse concertos, conferencias e encontros culturais para pór en valor este legado, que converteu o centro nun referente internacional na difusión do catalán no ámbito universitario fóra de Cataluña.
Fonte: Diari de la Llengua
O IES Concepción Arenal de Ferrol celebra do 16 ao 27 de marzo a quinta edición do Desafío Galego, unha iniciativa educativa que promove o uso do galego entre o alumnado. Un total de 204 estudantes de Bacharelato participan voluntariamente nun acordo lingüístico para empregar o galego no instituto, na vida diaria e tamén nas redes sociais, co obxectivo de reforzar a conciencia lingüística e normalizar o seu uso entre a mocidade.
O servizo de consultas lingüísticas Optimot fixo público o veredicto do #ConcursOptimot2026, no que os participantes debían crear novos refráns en catalán adaptados á vida actual e publicalos nas redes sociais. O xurado seleccionou dez propostas gañadoras entre 117, premiadas con subscricións a plataformas de contidos en catalán como FilminCAT e iQuiosc, co obxectivo de fomentar a creatividade e o uso correcto da lingua nas redes sociais.
Subscríbase ao boletín
