Paraguai presentou o primeiro dicionario audiovisual multilingüe (DamPy), unha ferramenta dixital innovadora que integra son e imaxe para facilitar a aprendizaxe de linguas. Na súa primeira fase inclúe castelán, guaraní, mbya e lingua de signos, co obxectivo de democratizar o acceso ao coñecemento e preservar a diversidade lingüística do país.

Fonte: Última hora

Afundación, a Xunta e o Centro PEN de Galicia convocan a vixésimo cuarta edición do Premio de Poesía, unha cita xa consolidada que procura impulsar a creación literaria en galego. As obras, inéditas e cun mínimo de 600 versos, poderán presentarse ata o 31 de xullo. O certame, dotado con 7000 euros, inclúe ademais a publicación do texto gañador na colección Arte de Trobar. Trátase dun dos galardóns máis relevantes da poesía galega, cunha traxectoria que reúne algunhas das voces máis destacadas do panorama literario do país.

Os ciclos temáticos de literatura en lingua galega teñen como obxectivo difundir a literatura galega e internacional editada en galego. Esta campaña de promoción da lectura comeza cun ciclo dedicado aos Estados Unidos, en Redondela, e outro dedicado aos dereitos da muller, en Chapela, pero irá mudando as súas temáticas trimestralmente.