Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Universidade de Yale, nos EUA, incluirá o catalán no seu programa oficial a partir do próximo curso, ampliando así a súa oferta de linguas. Os estudantes poderán cursar esta lingua dentro do departamento de español e portugués, nunha iniciativa que reforza a presenza do catalán no ámbito universitario internacional e contribúe á súa proxección global.
Fonte: Diari de la Llengua
O Concello de Poio, xunto coa SCD Raxó e coa colaboración do Consello Municipal de Cultura, convocará unha nova edición do Concurso Literario Xaime Illa Couto para recoñecer os mellores traballos de relato curto ou conto e poesía en lingua galega. O certame establece seis categorías por idades, con premios que van dos 90 aos 400 euros.
Fonte: Pontevedra Viva
O Concello do Barco de Valdeorras porá en marcha na Semana Santa un campamento piloto de inmersión en galego dirixido a nenas e nenos de entre 5 e 12 anos, co obxectivo de reforzar o contacto coa lingua propia nun contexto de perda de falantes entre a xente máis nova. A iniciativa, que se desenvolverá durante tres mañás na biblioteca municipal, combinará actividades lúdicas arredor do territorio e das tradicións galegas.
O Muséu del Pueblu d’Asturies acolle a exposición «Cartelos n’asturianu (1976-2000)», unha mostra que reúne materiais gráficos vencellados á promoción da lingua e da cultura asturianas procedentes da colección doada pola Fundación Belenos. A selección permite percorrer, a través dos carteis máis antigos, a evolución da comunicación visual en asturiano e o papel que desempeñou na reivindicación lingüística desde a Transición.
Os concellos de Errenteria, Lezo, Oiartzun e Pasaia animan a veciñanza a facer en éuscaro a declaración da renda de 2025 e, en xeral, a relacionarse coa facenda foral nesta lingua. A iniciativa pon o acento no avance progresivo do uso do éuscaro na administración e lembra que escoller esta opción resulta doado tanto por internet como de maneira presencial. Ademais, a campaña incluirá un sorteo en cada municipio, cun xantar para dúas persoas entre quen presente a declaración en éuscaro.
O secretario xeral da Lingua, Valentín García, participou no roteiro «A Compostela de Begoña Caamaño», que percorreu os principais espazos composteláns frecuentados pola autora homenaxeada polas Letras Galegas 2026 da man da historiadora Encarna Otero.
Fonte: O Portal da Lingua Galega
EITB impulsa catro novas miniseries en éuscaro (Amarekin goxo goxo, Aloka(h)iru, Izaki pixka bat gardenak e Estu) no marco da iniciativa «Formatu txikiak, Talentu berriak», orientada a promover a ficción seriada e o relevo creativo no audiovisual vasco. Tres das producións atópanse xa en rodaxe e a cuarta comezará en abril, con estreas previstas para o outono na plataforma Primeran.
CIG-Ensino vén de publicar a Guía para a normalización lingüística desde os Equipos de Normalización e Dinamización da Lingua Galega, un recurso pensado para apoiar o labor do profesorado implicado nestes equipos. Elaborada por Valentina Formoso Gosende, a publicación reúne reflexións, orientacións e propostas prácticas coas que se pretende facilitar e inspirar o traballo de dinamización nos centros.
O Termcat incorporou 246 novos termos ao Diccionari general de l’esport, que roza xa as 12 000 entradas, nunha nova aposta da Generalitat por reforzar a normalización do catalán no ámbito deportivo. A actualización acompáñase doutros recursos dixitais, como unha infografía sobre material de ximnasio e un xogo interactivo de vocabulario do baloncesto, ademais de obradoiros de sensibilización lingüística para profesionais do deporte.
A Facultade de Ciencias Xurídicas e do Traballo da Universidade de Vigo convocou a quinta edición do Premio de Investigación Xurídica en Lingua Galega Xosé Luis Franco Grande, unha iniciativa orientada a reforzar o uso do galego no ámbito académico e xurídico. O certame, dirixido ao alumnado universitario, establece dúas modalidades e premiará con 500 euros cada unha traballos orixinais sobre calquera cuestión xurídica. As propostas, redactadas en galego e cunha extensión de entre 20 e 40 páxinas, poderán presentarse ata o 10 de abril.
Subscríbase ao boletín
