Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Unha enquisa elaborada por Gradus Research revelou que actualmente o 60% da poboación ucraína fala a lingua nacional. O estudo observa tamén un incremento no uso da lingua en amplas zonas do país e, especialmente, entre as persoas máis novas e as de idades comprendidas entre os 55 e os 60 anos.
Fonte: Ukrinform
O conselleiro de Cultura, Educación, FP e Universidades, Román Rodríguez, avanzou no Parlamento de Galicia a posta en marcha das tres primeiras medidas do Proxecto Nós, a iniciativa que permite incorporar o galego ás novas linguaxes dixitais e que xa ten rematadas as tres primeiras ferramentas. Trátase de utilidades que estarán dispoñibles en aberto nun breve prazo de tempo para que calquera persoa, empresa ou proxecto as poida usar de xeito gratuíto.
A Guia Municipal d'Acollida está dispoñible en cinco idiomas (catalán, castelán, inglés, alemán e árabe) e inclúe información sobre os servizos que ofrece o Concello, así como outros aspectos básicos do municipio.
Fonte: Diario de Mallorca
Os exames de acreditación dos niveis de éuscaro, organizados por HABE, tiveron lugar entre o 4 e o 6 de maio. Nesta convocatoria máis da metade das persoas inscritas presentábase ao exame de C1.
Fonte: Gobierno Vasco
Un novo volume, o número 8, acaba de engadirse á colección de Termos esenciais relacionada co dereito. Trátase de Termos esenciais de dereito procesual, un glosario bilingüe (galego-español) que recolle máis de 1000 conceptos relacionados con esta área específica.
A Xunta de Galicia e Supermercados Gadis veñen de ratificar un acordo de colaboración para promover o uso da lingua galega entre a mocidade nas plataformas dixitais. O convenio, que se desenvolverá a través da Secretaría Xeral de Política Lingüística, foi asinado polo conselleiro de Cultura, Educación, FP e Universidades, Román Rodríguez, e a directora de Márketing e Responsabilidade Social Corporativa de Gadisa Retail, Melisa Pagliaro.
A embaixada de Alemaña en Bucarest destinará 900 000 euros á promoción do ensino do alemán entre a comunidade alemá de Romanía.
Fonte: Romania Insider
O Departamento de Estatística Institucional da Dirección Xeral de Planificación e Desenvolvemento da Universidade Autónoma de Aguascalientes, en México, realizou un estudo sociolingüístico que revelou que polo menos 55 estudantes falan unha lingua indíxena mexicana.
Fonte: El Clarinete
Malia o importante impulso do éuscaro respecto do seu coñecemento entre a poboación, obsérvase unha caída na transmisión desta lingua no ámbito familiar. Por este motivo, o Goberno vasco quere impulsar un plan que contribúa á transmisión lingüística desde a xestación ata a escola.
Unha delegación da comunidade lingüística flamenga de Bruxelas está de visita en Euskadi para, ao longo de cinco días, manter varias reunións para coñecer a situación do éuscaro e as políticas públicas de promoción desta lingua nos ámbitos institucional, educativo ou económico.
Subscríbase ao boletín
