Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Goberno de Cataluña asina un convenio coa Federación de Autoescolas de Cataluña para impulsar un plan de fomento do catalán no sector das autoescolas en coordinación e colaboración co sector. O Servizo Catalán de Tráfico ofrecerá tests en liña en catalán para o alumnado e materiais para a formación do profesorado. Tamén se difundirá a opción de estudar e obter o pemiso de conducir nesta lingua.
Fonte: Generalitat de Catalunya
O Instituto Vasco Etxepare (Etxepare Euskal Institutua) outorgará o premio ao mellor disco en éuscaro, como cada ano desde 2013, para darlle visibilidade e difusión á música independente creada nesta lingua. Na XV edición dos premios MIN poderán inscribirse os traballos publicados durante 2022 e o prazo para a presentación de candidaturas conclúe o 22 de febreiro.
Fonte: Etxepare Euskal Institutua
Volta a iniciativa "Ar Droed", "a pé", que busca incentivar o uso do galés con visitas guiadas de lugares destacados de Gales dedicadas a persoas que aprendan galés e falantes nativos.
Fonte: Nation Cymru
A ministra de Cultura do Brasil, Margareth Menezes, visitou o Museo da Lingua Portuguesa de São Paulo e participou no lanzamento da Red List Brasil, unha publicación do Consello Nacional de Museos que divulga unha lista de bens culturais en perigo.
Fonte: Museu da Língua Portuguesa
A Academia da Lingua Asturiana publica El sistema temporal en asturianoleonés: el habla de Somiedu, unha obra do filólogo alemán Helmut Brammerts, de 1969, sobre o uso dos tempos verbais en asturiano a través dos estudos dialectais do momento.
Fonte: La Nueva España
O Departamento de Filoloxías Románicas da URV crea un modelo lingüístico para avaliar os sentimentos subxacentes das mensaxes que se escriben nas redes sociais baseándose no estudo da linguaxe avaliativa. Ao captar a valoración que existe detrás das expresións empregadas, a investigación permite identificar a actitude dunha persoa con respecto a un tema e o seu estado emocional ou o efecto que pretende causar no lector, o que pode ter múltiples aplicacións en ámbitos como a minaría de datos, ferramentas de autoaprendizaxe de linguas ou en detectores automáticos de autoría.
A Real Academia Galega e o Concello de Ames continúan a súa colaboración en materia de lingua e infancia e mocidade co desenvolvemento do proxecto colaborativo «Modo galego, actívao!» co que se impulsarán iniciativas de dinamización lingüística fóra das aulas.
O secretario xeral de Política Lingüística, Valentín García, e a directora xeral de Xuventude, Participación e Voluntariado, Cristina Pichel, presentaron no Pazo de San Roque a duodécima edición do certame Lingua de namorar, o concurso de declaracións de amor en galego impulsado polas consellerías de Cultura e Política Social para dinamizar o uso da lingua galega entre a mocidade.
Liberan en Irán a Zahra Mohammadi, unha coñecida activista que fora detida por ensinar a lingua kurda e por fundar unha organización cultural que defendía os dereitos culturais da comunidade kurda en Irán.
Fonte: K24
Segundo cifras do Departamento de Xustiza, o uso do catalán nas actuacións dos avogados da quenda de oficio e asistencia ao detido creceu un 43 % ao longo de 2022, cun total de 10 726 actuacións con respecto ás 7483 feitas no ano 2021, cando se reiniciou o plan de fomento da lingua catalá no ámbito da xustiza.
Fonte: La Vanguardia
Subscríbase ao boletín
