Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O Ministerio de Asuntos Exteriores e as Secretarías de Estado de Cinema, Audiovisual e Medios de Comunicación, do Ensino Superior e da Educación de Portugal anunciaron en Lisboa o programa do Día Mundial da Lingua Portuguesa que se celebrará en 44 países do mundo nun formato virtual e presencial.
Fonte: SAPO 24
A Generalitat de Cataluña asinou un convenio co Estado español para a publicación en catalán de leis e outra normativa no BOE, algo que xa se vén facendo desde o ano 1998 e ao que este acordo lle dará continuidade.
Fonte: Generalitat de Catalunya
Para celebrar o Día de Aragón, a facultade recupera a exposición ‘Aragón 3L’ sobre a realidade lingüística da Comunidade e ofrece unha visión xeral sobre a situación do castelán, do aragonés e do catalán. Será posible visitala desde o día 26 de abril ata o día 3 de maio, de luns a venres e de 8:30 a 21:00 horas no edificio principal do centro.
Fonte: Radio Huesca
A comunidade virtual Orgullo Galego pon a disposición das persoas interesadas, de xeito temporal, unha colección de infografías cunha selección do léxico galego relacionado coa fauna e a flora autóctonas. A finalidade é que se usen como material didáctico pensando, sobre todo, na súa difusión entre os máis pequenos.
Fonte: Consello da Cultura Galega
A Biblioteca Municipal de Allariz convoca a primeira edición do Certame de Relato Curto para Afeccionados, co obxectivo de promocionar a creación literaria en lingua galega. Haberá tres categorías segundo a idade das persoas participantes: ata os 11 anos, de 12 a 17 anos e de 18 anos en adiante.
Fonte: Galicia Confidencial
O primeiro ministro de Nova Escocia, Iain Rankin, anunciou que se creará un novo campus para o estudo do gaélico que axudará a preservar e promocionar o uso desta lingua neste territorio canadense.
Fonte: Nova Scotia
O Ministro de Educación de Noruega anunciou que vai modificar os requisitos lingüísticos para poder optar á cidadanía norueguesa. As persoas que queiran conseguir a nacionalidade deberán agora demostrar un nivel B1 de noruegués.
Fonte: The Local
O deputado sueco Peter Helander levou ao Parlamento de Suecia a cuestión da preservación da lingua elfdaliana, un idioma ameazado que se fala nunha rexión central do país escandinavo.
Fonte: The Local
O Sistema Estatal de Radio e Televisión de Panamá inclúe na súa programación un programa de radio onde o público infantil pode aprender nocións da lingua indíxena guna. As clases están impartidas por mulleres deste pobo nativo de Panamá.
Fonte: Hola News
O Plan estratéxico do éuscaro 2021-24 busca protexer e seguir fomentando o uso desta lingua. O Consistorio solicita a participación da cidadanía e de axentes locais para completar a súa elaboración co obxectivo de que o documento reflicta a realidade actual e o futuro de Lazkao e da poboación local.
Fonte: El Diario Vasco
Subscríbase ao boletín
