Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O ensaio Assim nasceu uma língua do lingüista Fernando Venâncio aborda cuestións relacionadas coa orixe e evolución da lingua portuguesa e incide na idea de que o portugués falado na actualidade descendeu directamente do galego.
Fonte: Diário de Notícias
Varios proxectos europeos de investigación en materia sociolingüística e relacionados co tecnoloxías da lingua reciben o apoio da Dirección Xeral de Política Lingüística da Generalitat de Cataluña.
Fonte: Generalitat de Catalunya
A Universidade do País Vasco, en colaboración co Goberno desta comunidade, lanzou un novo mestrado co obxectivo de ofrecer unha formación específica sobre os novos coñecementos e metodoloxías que xurdiron nos últimos anos no proceso de revitalización do éuscaro.
A Deputación de Pontevedra convoca unha serie cursos formativos entre os que se atopan dous de contido lingüístico dedicados á linguaxe inclusiva. Estes cursos están destinados tanto ao seu persoal como ao dos concellos da provincia adheridos ao Plan agrupado de formación continua.
Fonte: Consello da Cultura Galega
Galicia é unha das comunidades autónomas de España con maior número de alumnas e alumnos de Educación Secundaria que estuda un segundo idioma estranxeiro, cunha porcentaxe do 69,3 %, só superada por Canarias que alcanza o 78,7 %.
Fonte: Galicia Confidencial
Dous dos proxectos que adquiren cada ano maior protagonismo no Mes das Letras Galegas para festexalas e honrar o autor anfitrión, desta vez Ricardo Carvalho Calero, xa están dispoñibles para a súa descarga libre e de balde desde o Portal da Lingua Galega da Xunta de Galicia.
Fonte: O Portal da Lingua Galega
As Bibliotecas Públicas de Galicia xestionadas pola Xunta súmanse aos actos para renderlle tributo a Ricardo Carvalho Calero, autor ao que este ano a Real Academia Galega (RAG) lle dedica o 17 de maio.
Fonte: O Portal da Lingua Galega
O Plan de desconfinamento da lingua galega, impulsado polo IES Eduardo Blanco Amor de Culleredo, ofrece unha serie de medidas, para que o alumnado desenvolva coa axuda do profesorado, destinadas a desconfinar gradualmente o galego ata acadar unha nova normalidade lingüística.
Fonte: Consello da Cultura Galega
O Foro Peinador, a Irmandade Galega de Agroalimentarios e Adegueiros e a Xunta de Galicia puxeron en marcha nas redes sociais a campaña “Con acento propio”, unha iniciativa que ten como obxectivo que a cidadanía identifique o uso do galego na etiquetaxe de produtos alimentarios como unha marca de calidade.
Fonte: Consello da Cultura Galega
Co gallo da celebración do Día das Letras Galegas, o Servizo Municipal de Bibliotecas do Concello da Coruña organiza distintas actividades para "desconfinar" o galego. Entre outras iniciativas, iniciarase unha campaña en redes sociais para convidar a cidadanía a participar cubrindo a cara con materiais nesta lingua (libros, CD, filmes...).
Fonte: Galicia Confidencial
Subscríbase ao boletín
