Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Lucía Varela, unha rapaza de Pantón, está traballando nun proxecto de recuperación de léxico. Recolle palabras que lles escoita cada vez menos ás persoas maiores e que considera en perigo de extinción. Para isto, creou un formulario en Google co obxectivo de que a xente lle envíe palabras co seu respectivo significado.
Fonte: Xornal de Lemos
O Mercado Artesán e Ecolóxico de Xixón, que se celebrou os días 15 e 16 de agosto na Praza Maior, acolleu unha nova edición de «A mercar cola Llingua», un xogo participativo a través de códigos QR que ten como obxectivo promover o asturiano e as tradicións do Principado.
Fonte: La Voz de Asturias
O museo do italiano, que terá a súa sede en Florencia, estará aberto posiblemente o vindeiro marzo, xa que o día 25 dese mes se celebra a Dante Alighieri. Este novo equipamento aproveitará as novas tecnoloxías para darlle un carácter interactivo, así como as contribucións da Academia da Crusca.
Fonte: Ahora Roma
Este proxecto, impulsado pola deputada provincial Natalia Rodríguez, ten como obxectivo impulsar o coidado e a promoción da lingua mbya guaraní, así como a creación dun mapa misioneiro deste idioma e un rexistro de intérpretes e tradutores.
Fonte: Misiones Online
O Concello de Ponteareas convoca a segunda edición do Premio Ponteareas, Lingua e Empresa, co obxectivo de recoñecer as empresas que utilizan o galego na súa actividade económica e fomentar o seu emprego no tecido económico ponteareán, así como estender o seu uso nas relacións laborais, comerciais e empresariais.
Fonte: Comarcas na Rede
Societat Civil Catalana presentou un informe sobre a convivencia lingüística en Cataluña, que conclúe que existe por parte da Generalitat unha desigualdade de trato cos castelanfalantes e que a cultura en español está marxinada, mentres que consideran que a Administración é practicamente bilingüe.
Fonte: El Punt Avui
Os indios cree, que habitan en Canadá e os Estados Unidos, teñen unha lingua que rolda os 96 000 falantes. Agora contan cunha aplicación creada para impulsar este idioma, servir de apoio aos estudantes e dalo a coñecer ao mundo.
Fonte: Nós Diario
O xefe da delegación ucraína no Grupo de Contacto Trilateral para a solución da situación no Dombás, Leonid Kravchuk, admite un uso máis amplo do ruso neste territorio, aínda que non o considera como segunda lingua oficial.
Fonte: Ukrinform
Seat, Toyota e Lexus aceptaron traducir ao catalán os manuais de 18 modelos de vehículos diferentes, o que significa que arredor de 10 000 páxinas están a disposición da clientela nesta lingua nas webs das compañías.
Fonte: El Confidencial Digital
A Dirección Xeral de Educación, Formación Profesional e Innovación Educativa convoca, con carácter gratuíto, cursos de linguaxe administrativa galega e cursos preparatorios para os certificados de lingua galega, Celga, que se realizarán en distintos períodos e en varias escolas oficiais de idiomas de Galicia.
Fonte: Xunta de Galicia
Subscríbase ao boletín
