Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O BNG solicitoulle por escrito ao Concello da Coruña que a sinalización, a información e os avisos que se realizan por megafonía na estación de autobuses sexan en galego, xa que na actualidade toda a comunicación se fai exclusivamente en castelán.
Fonte: La Opinión
O sitio web das mediatecas de Carcasona publicou en liña o único manuscrito que se conserva do Roman de Flamenca, unha novela anónima do século XIII considerada unha das máis importantes da literatura occitana.
Fonte: Jornalet
O Departamento de Defensa dos Estados Unidos de América (EUA) abriu en Taiwán o Chinese Overseas Flagship (COP), o segundo centro para a aprendizaxe do chinés que o país americano ten en Asia. Actualmente 22 estadounidenses estudan chinés neste centro que ten a súa sede na Universidade Nacional de Taiwán.
Fonte: Focus Taiwan
O Consello da Avogacía Catalá celebra unhas xornadas sobre o uso do catalán na Xustiza ante a preocupación polo descenso no número de sentenzas nesta lingua, un 7,7 % en 2018, polo que solicita apoio da xudicatura para asegurar os dereitos lingüísticos da cidadanía.
Fonte: Abogacía
O ciclo 'Cine valencià i cine en valencià. Els llenguatges de la cinematografia valenciana' terá por obxectivo analizar o sector audiovisual na actualidade así como o papel da lingua valenciana neste ámbito e contará con mesas de debate e diversas proxeccións, entre outras actividades.
Fonte: La Vanguardia
Román Rodríguez expuxo a folla de ruta do Ano Santo con accións e medidas concretas que involucran a diversas consellerías a través dun plan de goberno para “dar forma a un Xacobeo extraordinario que defina a Galicia da próxima década”. A lingua, como ferramenta de integración e convivencia, disporá dun 5,3% máis de fondos para fomentar o galego nos ámbitos familiar, de lecer e socioeconómico.
O secretario xeral de Política Lingüística, Valentín García, asistiu, no Museo do Pobo Galego, á presentación das exposicións resultantes das propostas gañadoras do XI Proxecto Didáctico Antonio Fraguas.
Fonte: O Portal da Lingua Galega
O secretario xeral de Política Lingüística, Valentín García, e o delegado territorial Ovidio Rodeiro asistiron na Casa da Cultura de Camporrapado ao espectáculo de dinamización lingüística "A nena e o grilo máis aló".
Fonte: O Portal da Lingua Galega
A proximidade dos Xogos Olímpicos de Toquio 2020 serve de estímulo para a aprendizaxe da lingua de signos internacional. Cada vez máis persoas no Xapón asisten a cursos de lingua de signos co fin de mellorar a comunicación con persoas con problemas de audición doutros lugares do mundo.
Fonte: Kyodo News
A Asemblea Xeral do Comité Paraolímpico Internacional votará se inclúe o portugués como lingua de traballo da organización.
Fonte: TSF
Subscríbase ao boletín
