Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
“Usa a lingua” é o título desta iniciativa, posta en marcha por un grupo de estudantes, para reivindicar o uso do galego e animar o alumnado da Facultade de Ciencias Sociais e da Comunicación a falalo. Para iso, organizan unha xornada lúdica na que, entre outras actividades, haberá un concerto de rap a cargo do grupo Ezetaerre.
Fonte: Universidade de Vigo
Desde o departamento dedicado á política lingüística no arquipélago están a traballar para poñer en marcha actuacións para impulsar o emprego do catalán nos sectores onde menos se fala, entre eles nos espazos de lecer da mocidade.
Fonte: 20 minutos
O secretario xeral de Política Lingüística, Valentín García, asistiu en Santiago ao relatorio de Ameto Mítico, unha acción da Fundación Uxío Novoneyra incluída no programa O teu Xacobeo da Xunta.
Fonte: O Portal da Lingua Galega
O secretario xeral de Política Lingüística, Valentín García, asistiu, na Casa da Cultura de Brión, á presentación dunha nova publicación do Centro Ramón Piñeiro para a Investigación en Humanidades (CRPIH). Trátase do ensaio Roberto Vidal Bolaño. Unha poética teatral xenuinamente galega, da autoría do profesor, investigador e colaborador do CRPIH Manuel Quintáns Suárez.
Ambas as institucións asinaron un convenio marco de colaboración, de catro anos de duración, polo que neste exercicio se destinarán 80 000 euros a promover o emprego do éuscaro na capital arabesa a través de diferentes iniciativas.
Fonte: Gasteiz Hoy
Segundo a tese realizada por Xurxo Fernández Carballido, a presenza do portugués no sistema educativo galego é deficitaria, principalmente en Primaria, Secundaria, Bacharelato e FP. Si está presente nas tres universidades e na maioría das escolas oficiais de idiomas.
Fonte: Galicia Confidencial
O Goberno comunicou que a decisión actual pasa por impulsar unha nova normativa que garanta a seguridade xurídica e solucione o baleiro legal sobre o decreto de 2017.
Fonte: El Correo
Esta campaña, cuxo lema é “O galego ten razóns. E ti, que razón tes?”, busca fomentar o uso desta lingua entre o alumnado novo que chega á Facultade de Bioloxía e que este reflexione sobre as súas motivacións para manterse en galego ou incorporalo á súa práctica lingüística.
Fonte: Consello da Cultura Galega
Unha familia da Bretaña que quería empregar o nome bretón Fañch para o seu fillo gañou a batalla nos tribunais despois de que un xulgado de Rennes decretase que pode ser inscrito con este nome. Inicialmente as oficinas públicas de Francia rexeitaran esta grafía porque non era recoñecida pola lingua francesa.
Fonte: Le Parisien
Os Premios San Martiño de Normalización Lingüística, que convoca desde 1991 a Asociación Cultural O Brado da Estrada, chega á súa 29ª edición na que se premiarán polo seu labor de difusión do galego a atleta Ana Peleteiro, o Museo do Pobo Galego e a Asociación Cultural Tamparrantán.
Fonte: Cultura Galega
Subscríbase ao boletín
