TV-3 estrea 10 cites (23.40 horas), unha serie de 13 capítulos de 15 minutos cada un que mostran historias de convivencia entre parellas lingüísticas, unha practica habitual do programa de Voluntariat per la Llengua.

Fonte: El Periódico de Catalunya

A plataforma cívica Conceyu Abiertu pola Oficialidá, na que se insiren máis de 150 organizacións de todo tipo co obxectivo común de lograr a oficialidade do asturiano na reforma do estatuto de autonomía, convoca para o mes de outubro unha nova mobilización masiva pola oficialidade da lingua asturiana.

Fonte: Asturies.com

O conselleiro de Innovación, Empresa e Emprego do Goberno de Navarra, José María Roig, presentou o pasado venres día 26 de setembro o programa 'Lingua Empresa' que impulsará a aprendizaxe de idiomas por parte dos traballadores, no transcurso dun acto organizado con motivo da celebración do Día Europeo das Linguas.

Fonte: Diario de Navarra

O centro de terminoloxía Termcat publicou en liña un dicionario do ámbito da psiquiatría co obxectivo de difundir a terminoloxía relativa a este ámbito médico.

Fonte: MedicinaTV

A renovación do convenio entre o Ministerio de Educación e o British Council permitiu a incorporación de seis novos centros de educación infantil en Aragón con educación bilingüe, cinco deles en Zaragoza e un en Teruel. Con estas incorporacións son xa 114 centros educativos os adscritos a este programa e 23.000 os alumnos.

Fonte: Aragón Digital

A Universitat de Lleida ten previsto iniciar no próximo curso (2009-2010) os estudos de grao en catalán e occitano, a fórmula que permitirá adaptar a antiga Filoloxía Catalá ás directrices marcadas polo Plan de Boloña e que converterá esta universidade na única do Estado que impartirá os estudos de grao en lingua occitana.

Fonte: La Mañana

A presidenta do Partido Popular en Cataluña, Alicia Sánchez-Camacho, mostrou unha posición firme contra a inmersión lingüística que planea sobre as aulas catalás. Durante a reunión que mantivo co conselleiro de Educación, Ernest Maragall, condicionou o pacto da futura Lei de educación, que se atopa agora en trámite parlamentario, a acatar o cumprimenro da terceira hora de castelán en primaria.

Fonte: La Razón

O profesor de Historia Contemporánea da Universidade Pública de Navarra, Juan Madariaga Orbea, presentou o libro Apologistas y detractores de la lengua vasca, obra na que a través de artigos e estudos recompila a opinión sobre o éuscaro de máis de 60 autores dos séculos XVI ao XIX.

Fonte: Diario de Navarra

Para fin de ano, a comisión especial Euskara 21, que se puxo en marcha hai cinco meses dentro do Consello Asesor do Éuscaro para reflexionar acerca do futuro da política lingüística, terá listo o documento no que suxerirá ás institucións cales deberían ser as bases da política lingüística dos próximos anos.

Fonte: Diario Vasco

A cidade de Castellón dispón de dez centros concertados e privados onde se imparte educación primaria. Só nun destes colexios se pode estudar liña en valenciano ou acceder ao programa de inmersión lingüística que prevé a Lei de uso e ensino do valenciano aprobada en 1983, segundo se extrae dun estudo de Escola Valenciana-Federació d'Associacions per la Llengua.

Fonte: Levante