Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Xunta de Goberno local de Bilbao aprobou un novo plan de normalización do éuscaro, cuxa vixencia se estenderá ata 2022, co obxectivo de fomentar o uso desta lingua entre o persoal do Consistorio e que se centrará en dous eixes de actuación: o servizo á cidadanía e o traballo interno do funcionariado.
Fonte: El Correo
A Asociación de Publicacións Periódicas en Catalán (APPEC) lanzou a campaña “Sigues lliure, llegeix” co obxectivo de impulsar a lectura de revistas nesta lingua, así como combater a manipulación informativa e as noticias faltas.
Fonte: Generalitat de Catalunya
O Goberno de Navarra destinará 40 000 euros a axudas para a promoción, difusión e normalización do éuscaro no ámbito das tecnoloxías da información e a comunicación. Con esta convocatoria preténdese incentivar a creación ou a adaptación a esta lingua de sitios web, aplicacións e programas informáticos.
Fonte: Diario de Navarra
Turismo de Aragón, coa colaboración da Dirección Xeral de Política Lingüística, impulsou, no marco do proxecto Linguatec, Aragonario, un dicionario en liña castelán-aragonés. Trátase dunha ferramenta sinxela que, ademais de traducir palabras dunha lingua a outra, ofrece información gramatical complementaria, así como enlaces de interese sobre as linguas desta comunidade.
O Festival de Cannes proxectará en competición na súa vindeira edición, que se celebrará entre os días 14 e 25 de maio, por vez primeira un filme galego e en galego, a obra O que arde do director Óliver Laxe.
Fonte: Faro de Vigo
O secretario xeral de Política Lingüística, Valentín García, participou en Portas na homenaxe que a Asociación Cultural e Deportiva Domingo Fontán lle rendeu, con motivo do 231º aniversario do seu nacemento, ao autor da Carta xeométrica de Galicia, o primeiro mapa moderno e elaborado con métodos matemáticos do noso territorio.
Fonte: O Portal da Lingua Galega
Segundo o Atlas Sociolingüístico dos Pobos Indíxenas en América Latina aproximadamente 500 idiomas orixinarios de América Latina están en perigo de desaparecer. Esta rexión non é a que ten un maior número de linguas mais si a que presenta a maior diversidade lingüística do mundo.
Fonte: El País
A cidade de Galway enviou unha enquisa á veciñanza para preguntarlle a súa opinión sobre o novo Plan da Lingua Irlandesa e as medidas que se poden levar a cabo para incrementar o seu uso.
Fonte: Galway Daily
A Secretaría Xeral de Política Lingüística ten aberto ata o 25 de abril o prazo para matricularse nas probas para a obtención dos certificados de lingua galega que se celebrarán en Santiago de Compostela (niveis Celga 1, 2, 3 e 4) e en Ponferrada (niveis 2, 3 e 4) o vindeiro mes de xuño.
Fonte: O Portal da Lingua Galega
O FalaRedes, o programa de dinamización que a Consellería de Cultura e Turismo impulsa a través da Secretaría Xeral de Política Lingüística, fará dúas paradas en Semana Santa coa actividade Canta, miña pedra, canta.
Fonte: O Portal da Lingua Galega
Subscríbase ao boletín
