Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O proxecto de lei que quere obrigar a ensinar en francés as materias científicas, no canto de en árabe, está levantando unha forte polémica en Marrocos. Uns 150 activistas e intelectuais asinaron unha petición para mostrar a súa oposición á medida.
Fonte: Morocco World News
Acábanse de cumprir 70 anos da chegada do galego á radio da BBC por medio dun programa que se emitía cada tres semanas e no que colaboraron un bo número de intelectuais da época co fin de manter viva a cultura galega durante os primeiros anos da ditadura franquista.
Fonte: Praza Pública
O Instituto Galego de Análise e Documentación Internacional publicou un informe dedicado á relación de Galicia co ámbito lusófono baixo o título A lusofonía en Galicia: entre a lei Paz Andrade e a Estratexia Galega de Acción Exterior. Nel faise unha reflexión sobre a oportunidade económica e cultural que supón este vínculo e da vantaxe coa que conta Galicia pola proximidade lingüística entre o galego e o portugués.
A Asociación de Funcionarios para a Normalización Lingüística (ANFL) denunciou o desinterese polo galego da Axencia Tributaria, xa que a aplicación informática para presentar a declaración da renda nesta lingua presenta varios erros ortográficos e gramaticais.
Fonte: Galicia Confidencial
O Centro Ramón Piñeiro para a Investigación en Humanidades publicou as novas versións do proxecto CORGA (Corpus de Referencia do Galego Actual) e do etiquetador/lematizador XIADA, dous recursos de grande utilidade para aumentar a presenza do galego nas novas tecnoloxías.
Fonte: Código Cero
O secretario xeral de Política Lingüística, Valentín García, participou no Pazo de San Roque, sede do Centro Ramón Piñeiro para a Investigación en Humanidades (CRPIH), na presentación do volume décimo noveno dos Cadernos de fraseoloxía galega.
Fonte: O Portal da Lingua Galega
O Goberno de Navarra e Euskaltzaindia asinaron o convenio de colaboración para o ano 2019, grazas ao que destinarán 169 000 euros á normalización, ao desenvolvemento e ao estudo do éuscaro.
Fonte: Noticias de Navarra
Os tribunais dos EUA non contan con suficientes intérpretes de linguas indíxenas como o kanjobal ou o quiché para atender a crecente chegada de persoas migrantes.
Fonte: Infobae
O Congreso Permanente da Lingua Occitana organizou unha xornada de estudo das linguas rexionais francesas no Senado da República en París.
Fonte: Jornalet
Un equipo de catro físicos da Universidade de Santiago presentou un estudo que revela que as zonas urbanas facilitan o mantemento da diversidade fronte á globalización. No que respecta ás linguas, e no caso concreto de Galicia, mediante a aplicación dun modelo matemático conclúen que a evolución do número de falantes de galego e castelán cambia máis lentamente nas cidades.
Subscríbase ao boletín
