Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Deputación Foral de Áraba estreará este verán, na última semana de xullo, un novo campamento de inmersión no éuscaro, para mozas e mozos de 12 e 13 anos, denominado Euskalaka, cuxo principal obxectivo será afondar nesta lingua a través da edición de vídeos e a aprendizaxe de redes sociais.
Fonte: Noticias de Álava
A plataforma Netflix estrea a serie O sabor das margaridas, que ofrecerá na súa versión orixinal en lingua galega, así como dobrada ao español. Consta dun total de seis capítulos e está producida por CTV, Comarex e a TVG.
Fonte: Código Cero
Toponimia de Ames é o título dun traballo do filólogo Xosé Ramón López Boullón no que analiza a orixe de 116 nomes de parroquias e lugares habitados deste concello, aos que se suman as explicacións doutros 13 topónimos.
Unha proposta da administración Trump dos EUA prevé o peche das emisións en tres linguas minoritarias da Federación Rusa na emisora Radio Free Europe. As linguas son o tártaro, o baskir e o checheno.
Fonte: Nationalia
O crecente interese pola cultura e lingua tibetanas levou o Goberno da Rexión do Tíbet a lanzar unha nova aplicación para aprender tibetano. Trátase dunha iniciativa que busca protexer e promover esta lingua.
Fonte: Global Times
Un concelleiro do Condado de Donegal, no norte da República de Irlanda, foi obrigado a expresarse en inglés ante a negativa de facilitarlle interpretación simultánea de gaélico a inglés.
Fonte: Highland Radio
O secretario xeral de Política Lingüística, Valentín García, asistiu ao acto organizado pola Irmandade Xurídica Galega e pola Asociación de Funcionarios para a Normalización Lingüística, en colaboración coa Secretaría Xeral de Política Lingüística da Consellería de Cultura e Turismo e co Concello, para conmemorar a primeira sentenza en lingua galega ditada nos xulgados da vila.
En breve aparecerá nas grandes pantallas a longametraxe SGaawaay K’uuna que foi filmada na súa totalidade en dous dialectos da lingua haida, idioma indíxena de Norteamérica que actualmente conta con tan só 20 falantes.
Fonte: The Guardian
O secretario xeral de Política Lingüística, Valentín García, asistiu á presentación da nova antoloxía de poesía galega Arrincando marcos 2019, que sae do prelo co apoio da Secretaría Xeral de Política Lingüística no marco da iniciativa do mesmo nome que busca dar a coñecer a poesía da Galicia actual en Portugal como medio de superar as barreiras que nos separan deste país.
O día 6 de abril Xixón acollerá unha manifestación de apoio á oficialidade do asturiano. Por este motivo, a Xunta pola Defensa de la Llingua puxo en marcha un reto (#OficialidaChallenge) para que as redes sociais se enchan de vídeos de apoio á participación na marcha.
Fonte: La Nueva España
Subscríbase ao boletín
