Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Unha asociación de profesorado de lingua portuguesa en Francia rexeita a reforma educativa francesa que obriga a que o portugués deixe de ter validez nos exames de bacharelato. As persoas afectadas temen que isto provoque unha baixada no número de matrículas.
Fonte: Notícias ao Minuto
A ministra de Cultura, Xuventude e Deporte de Andorra presentou a campaña "Entrena la llengua" que pretende o fomento da lingua catalá entre a xente nova que practica actividades deportivas extraescolares.
Fonte: La Vanguardia
O secretario xeral de Política Lingüística, Valentín García, acompañado de Javier Blanco, subdirector de Relacións cos Grupos de Desenvolvemento Rural, abriu a I Xornada de Interpretación da Cultura e o Turismo nas Actividades Físicas e Deportivas organizada polo IES Terra de Turonio co apoio da Consellería do Medio Rural.
Fonte: O Portal da Lingua Galega
O CEIP Xesús San Luís Romero de Carballo (A Coruña) e o IES Álvaro Cunqueiro de Vigo (Pontevedra) fixéronse cos premios do Concurso-Exposición Letras Galegas 2019 que, como cada ano, convocaron a Secretaría Xeral de Política Lingüística da Consellería de Cultura e Turismo e a Dirección Xeral de Educación, Formación Profesional e Innovación Educativa da Consellería de Educación, Universidade e Formación Profesional.
O prazo para solicitar as axudas destinadas ao fomento e á difusión da lingua de signos catalá, que contan cunha dotación económica de 45 000 euros, estará aberto ata o 28 de marzo, e a elas poden optar entidades privadas sen ánimo de lucro e persoas físicas.
Fonte: Generalitat de Cataluña
O Concello de Basauri e a Casa de Cultura organizan unha nova edición do programa infantil en éuscaro Olgetan, ondo pasau!, destinado a nenas e nenos de ata 12 anos que entre os meses de marzo e xuño poderán acudir a varias actividades como obradoiros, sesións de maxia etc.
Fonte: El Correo
A Coordinadora de Traballadores/as de Normalización da Lingua aprobou na súa Asemblea Xeral celebrada o pasado 9 de marzo en Santiago de Compostela as liñas de acción para este ano 2019.
Fonte: CTNL
A Deputación de Pontevedra entregará axudas para a promoción do galego a 35 concellos, sete dos cales dedicarán estas subvencións á creación ou mantemento do servizo de normalización lingüística, mentres que 28 as destinarán a programas de dinamización.
Fonte: Deputación de Pontevedra
O XXIV Premio Literario Arcebispo Juan de San Clemente Rosalía-Abanca O Camiño das Letras, impulsado pola Asociación Cultural Instituto Rosalía de Castro en colaboración coa Consellería de Cultura e Turismo, a través da Secretaría Xeral de Política Lingüística, e co patrocinio de Abanca fará entrega dos seus galardóns a Marcos Calveiro (lingua galega), Pedro Mairal (lingua castelá) e Han Kang (lingua estranxeira) o mércores 20 de marzo, nun acto que se celebrará no auditorio compostelán Abanca.
O municipio de Gywnedd, no norte de Gales, reduciu considerablemente a partida orzamentaria destinada a centros de inmersión en lingua galesa para menores procedentes doutras zonas do Reino Unido e do estranxeiro que non dominen este idioma.
Fonte: North Wales Live
Subscríbase ao boletín
