Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Os catedráticos Fabio Yu-Chung Lee da Universidade Nacional Tsing-Hua de Taiwán e José Luis Caño Ortigosa da Universidade de Sevilla descubriron no arquivo da Universidade de Santo Tomás de Manila (Filipinas) o dicionario chinés-español máis antigo e completo do que se ten coñecemento.
Fonte: University of Santo Tomás
O senador de Compromís Carles Mulet reclámalle ao Goberno máis recursos para promover a lingua leonesa e unha maior implicación no seu desenvolvemento e difusión, como así se recolle na Carta Europea das Linguas Rexionais ou Minoritarias, ratificada polo Estado español.
Fonte: Ileón
O último número da publicación O Cartafol dixital recolle os datos sobre usos lingüísticos na actividade docente da Universidade de Santiago durante o curso 2018-2019. Entre a información proporcionada destaca o feito de que se imparten en castelán o 73,69 % das horas docentes; en galego, o 22,57 %; e noutras linguas (inglés, portugués…), o 2,74 %.
Fonte: Consello da Cultura Galega
O Plan de (tele)formación en lingua galega da Xunta de Galicia continúa a súa aposta pola formación en liña para chegar a calquera lugar e adaptarse aos diferentes horarios da poboación adulta, facilitando deste xeito o seu acceso ao coñecemento do galego. En concreto, a teleformación inclúe este ano por primeira vez cursos do nivel Celga 3 que se suman aos dos niveis Celga 1 e Celga 4 xa existentes.
O secretario xeral de Política Lingüística, Valentín García, participou na homenaxe que a Secretaría Xeral de Política Lingüística, o IES de Mos e o Club de Lectura “Amibros” lle renderon no Auditorio Municipal de Vigo, tanto a Rosalía de Castro, cuxo nacemento se celebrará o vindeiro 24 de febreiro, como á que foi, ata o seu recente pasamento, a maior estudosa da súa vida e obra: Victoria Álvarez Ruiz de Ojeda.
O Concello de Bilbao e Euskaltzaleen Topagunea organizan a XIV edición de Harrapazank, un programa que promove a cultura, a creatividade e o éuscaro entre a mocidade de 12 a 18 anos a través de obradoiros con diferentes actividades.
Fonte: Deia
O kenyano Roy Allela creou unhas luvas capaces de converter lingua de signos en sons. O invento foi xa nomeado para o Premio Africano de Innovación en Enxeñaría.
Fonte: Shifter
O responsable do Ministerio de Asuntos Exteriores do Brasil, Bruno Zétola, declarou que o seu goberno desexa sistematizar os programas de ensino do portugués para persoas estranxeiras ou nacionais que non falen o portugués como primeira lingua.
Fonte: Observador
O Palau da Generalitat acolleu a reunión do pleno do Consello Social da Lingua Catalá na que se abordaron temas como a importancia do acceso a contidos audiovisuais en catalán na infancia así como prioridades de actuación, como o ensino desta lingua entre a poboación adulta inmigrante.
Fonte: Generalitat de Cataluña
A rúa do Príncipe de Vigo é un exemplo para constatar a escasa presenza do galego no comercio. Proba disto é que só a tenda do Celta conta con anuncios de rebaixas exclusivamente en galego, mentres que son seis os establecementos que anuncian os descontos en galego e castelán e o resto unicamente neste último idioma. Porén, o inglés está presente na maioría deles.
Fonte: La Voz de Galicia
Subscríbase ao boletín
