O Dicionario de Cambridge anunciou que "nomophobia", o medo ou ansiedade de estar sen o teléfono móbil, é a palabra do ano da lingua inglesa en 2018.
Fonte: The Star
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
21 de decembro de 2018
Unha investigación realizada na Universidade de Bangor revelou que as nenas e nenos con síndrome de Down non teñen máis dificultades á hora de adquirir varias linguas ou medrar en fogares bilingües. Aínda que o estudo se baseou nos casos de familias que falaban inglés e galés, os resultados poderían aplicarse a calquera outro idioma.
Fonte: BBC
21 de decembro de 2018
A Escola Galega de Administración Pública organiza o Concurso de literatura infantil e xuvenil do Día das Letras Galegas, un certame que busca concienciar as nenas e os nenos da necesidade de impulsar a dinamización do galego.
Fonte: EGAP
21 de decembro de 2018
Este plan ten como obxectivo aumentar a presenza e o uso do éuscaro en todos os ámbitos universitarios, así como ofrecer todas as materias obrigatorias nesta lingua. Perséguese así incrementar a cantidade de material docente e os recursos lingüísticos en éuscaro, e o número de teses de doutoramento internacionais e a repercusión das revistas científicas e as coleccións neste idioma.
Fonte: Deia
21 de decembro de 2018
O xurado do Premio Lingua e Empresa decidiu declarar gañadoras tres empresas amesás, que se repartirán o importe do galardón a partes iguais: Biosbardos, Xestiago e Asesoría Xeral Galega SL. Cada unha recibirá 833,33 € e unha campaña de difusión na Radio Municipal de Ames.
Fonte: Concello de Ames
21 de decembro de 2018
O Concello de Pamplona organiza ‘Biko-teka’, un obradoiro de ilustración e narración para crear libros ilustrados en éuscaro que se desenvolverá entre o 28 de xaneiro e o 1 de febreiro de 2019.
Fonte: Pamplona Actual
21 de decembro de 2018
O Goberno de Macau informou de que unhas 4500 persoas estudan actualmente lingua portuguesa nas escolas de ensino medio de Macau. Tamén no ensino superior as cifras son boas e rexistraron un incremento dun 67 %.
Fonte: Diário de Notícias
21 de decembro de 2018
Un grupo de investigadores da Universidade de Manchester revelou que as preguntas empregadas para elaborar o censo no Reino Unido poderían non reflectir a diversidade lingüística do país.
Fonte: The University of Manchester
20 de decembro de 2018
Os irmáns animados máis famosos de Galicia, Os Bolechas, emprenden este sábado, 22 de decembro, unha nova viaxe da man do programa Nadal en Rede, da Rede de Dinamización Lingüística (RDL) da Xunta de Galicia, na que levarán a súa actividade –que conta tamén coa colaboración de Gadis e mais da Compañía Radio-Televisión de Galicia (CRTVG)– ao Porriño, Viveiro, Cambados, Vilagarcía de Arousa, Vimianzo, Ourense, Muros, Ponteareas e Rianxo, ata o 7 de xaneiro.
20 de decembro de 2018
Monike eta Joanes Antzinako Egipton é o nome deste novo proxecto, un dos poucos videoxogos narrativos que existen en éuscaro que trata as aventuras de dous nenos dentro da Gran Pirámide de Exipto.
Fonte: El Correo
Boletín
Subscríbase ao boletín
