Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Debido ao incremento de colexios e institutos en Aragón que imparten algunha clase en aragonés ou en catalán, o Goberno desta comunidade publicou o proxecto de Orde polo que se regulan os proxectos lingüísticos en linguas propias de Aragón nos centros educativos.
Fonte: Heraldo
O secretario xeral de Política Lingüística, Valentín García, participou no acto de entrega do Premio Ramón Otero Pedrayo 2018, ex aequo, a Antía Cal e María Xosé Queizán.
Fonte: O Portal da Lingua Galega
O Instituto Camões asinou un acordo coa Universidade Nacional de Guinea Ecuatorial para colaborar en materia de promoción da lingua portuguesa no país africano. O obxectivo é adaptar as institucións públicas ás necesidades da súa adhesión á Comunidade de Países de Lingua Portuguesa (CPLP).
Fonte: O Jornal Económico
O ministro de Educación de Malaisia, Maszlee Malik, defendeu a necesidade de remodelar o sistema educativo para garantir que o alumnado poida dominar como mínimo unha terceira lingua, ademais do malaio e o inglés.
Fonte: Channel Newsasia
Un informe da Mesa pola Normalización Lingüística reflicte a preocupante situación do galego no sector dos xoguetes. Tras a análise de case 25 000, a conclusión é que só o 0,69 % contén esta lingua, é dicir, 148 produtos, mentres que o 0,38 % está unicamente en galego.
Fonte: GaliciaPress
A obra Ver da escritora Sara Brandão gañou a cuarta edición do Premio Literario Nortear para a mocidade escritora de Galicia e do Norte de Portugal, un certame promovido conxuntamente pola Consellería de Cultura e Turismo –a través da Dirección Xeral de Políticas Culturais–, pola Dirección Rexional de Cultura do Norte de Portugal e pola Agrupación Europea de Cooperación Territorial Galicia-Norte de Portugal.
O secretario xeral de Política Lingüística, Valentín García, participou no acto de entrega dos XIX Premios Manuel Beiras ao uso do galego na empresa, que convocan conxuntamente o Concello e a Cámara de Comercio composteláns.
Fonte: O Portal da Lingua Galega
O Goberno vasco entregou, no Palacio Europa de Vitoria, os certificados Bikain que recoñecen a calidade na xestión lingüística. Nesta décima edición concedéronse 20 destes certificados a entidades públicas e privadas: once lograron o nivel superior (Bikain Ouro), sete o nivel medio (Bikain Prata) e dúas o básico (Bikain Negro).
Fonte: La Vanguardia
Un total de 2,33 millóns de euros é o orzamento que destinará a Deputación de Biscaia en 2019 a subvencionar empresas, persoas xurídicas sen ánimo de lucro, concellos e mancomunidades para que fomenten e difundan a presenza do éuscaro na sociedade.
Fonte: 20 minutos
Estatísticas recentes revelaron que a Universidade de Bangor, no norte do País de Gales, é a que acolle un maior número de estudantes que cursan os seus estudos universitarios integramente en galés.
Fonte: The Bangor Aye
Subscríbase ao boletín
