Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Estas xornadas, organizadas pola Deputación da Coruña, pretenden servir de oportunidade para facer diagnose, analizar a situación actual e, desde aí, continuar o camiño da normalización lingüística do galego. Celebraranse un total de catro sesións, en diferentes datas e lugares, cada unha dedicada a un tema diferente: relación entre lingua e políticas públicas, memoria, transmisión non familiar e xéneros.
Fonte: Deputación da Coruña
O Instituto de Estudos Cataláns celebra o 19 de outubro en Barcelona a primeira Fes-te de la Llengua, coa finalidade de mostrar o carácter expresivo e lúdico do catalán. Esta primeira edición estará dedicada ao colectivo do profesorado que imparte esta lingua, así como aos estudantes de Filoloxía Catalá.
Fonte: Generalitat de Catalunya
As datas de realización das probas para a obtención dos certificados de lingua galega dos niveis Celga 4 e 2 serán o 17 e o 24 de novembro de 2018 respectivamente.
Fonte: Consello da Cultura Galega
Na modificación da súa relación de postos de traballo, o Concello de Val do Dubra suprimiu a praza de técnico/a de normalización lingüística, que transformou nun posto de técnico/a de Administración xeral. Desde a Coordinadora de Traballadores/as de Normalización da Lingua (CTNL) solicítanlle que rectifique, xa que este municipio conta con servizo lingüístico desde o ano 2002.
A segunda edición de ‘Toponimízate. Falámosche dos nomes da túa terra’ bota a andar o vindeiro mércores, 24 de outubro, en 15 concellos da Rede de Dinamización Lingüística (RDL). A iniciativa, posta en marcha o ano pasado con grande éxito de acollida de participación, ofrece outros tantos encontros en aberto dirixidos á cidadanía en xeral nos que persoal técnico especialista en toponimia pon en valor a microtoponimia, co obxectivo de concienciar sobre a importancia e a necesidade da xeorreferenciación e xeolocalización deste patrimonio inmaterial.
A escritora irlandesa Anna Burns acaba de conseguir un dos maiores premios literarios en lingua inglesa, o Man Booker, pola súa novela Milkman.
Fonte: The Guardian
Un programa do goberno do estado australiano de Victoria promoverá a aprendizaxe de idiomas indíxenas e da lingua de signos en 29 centros de ensino infantil de todo o estado.
Fonte: The Age
O presidente da Academia da Lingua Asturiana reuniuse co tamén presidente do Intergrupo de Linguas Minoritarias do Parlamento Europeo para entregarlle un informe sobre a situación do asturiano, así como sobre a necesidade de que se converta en lingua oficial.
Fonte: El Comercio
O Instituto Vasco Etxepare levará ás Euskal Etxeak e ás universidades internacionais, do 23 de novembro ao 3 de decembro, a iniciativa de promoción do éuscaro "Euskaraldia: 11 egun euskaraz" coa axuda de persoas que actuarán como embaixadoras.
Fonte: Diario Vasco
Diferentes países de varios continentes celebrarán a XVIII Semana da Lingua Italiana no Mundo con multitude de actividades. O tema deste ano é a presenza do italiano nas redes virtuais.
Fonte: Askanews
Subscríbase ao boletín
