Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Obra Cultural Balear reuniu a Rede Territorial pola Lingua para preparar as mobilizacións a prol da recuperación do catalán no arquipélago. Así mesmo, a reunión serviu para coordinar as actividades que van realizar e preparar dúas campañas: unha no ámbito da lingua e outra no da cohesión social.
Fonte: UH Noticias
Google acepta publicidade en 44 linguas, entre as que figura o español, o portugués ou o catalán, pero non o galego. Así o denunciou a organización do festival Cantos na Maré que non puido contratar unha campaña para difundir a celebración deste evento.
Fonte: Praza Pública
Diferentes colectivos de defensa do gaélico irlandés demandaronlle ao Goberno de Irlanda que aprobe un programa que garanta investimento suficiente para preservar a lingua e crear postos de traballo nas zonas onde se fala.
Fonte: The Irish Times
Un comité da Asemblea do País de Gales quere que a lingua de signos británica se converta no primeiro idioma dos escolares galeses xordos. Actualmente, a lingua de signos considérase só un idioma minoritario.
Fonte: ITV
A Asociación Lingua Nacional, coa colaboración da Dirección Xeral de Política Lingüística, convoca a primeira edición dun premio para proxectos empresariais de calquera territorio de fala catalá que mostren o seu compromiso co catalán e axuden na extensión e o uso correcto desta lingua.
Fonte: Generalitat de Cataluña
A sétima edición dos premios Pompeu Fabra, correspondente ao ano 2018, recoñece o labor da Asociación de Escritores en Lingua Catalá, os profesores Mila Segarra e Jordi Mir, os establecementos König, a Asociación de Publicacións Periódicas en Catalán, o presentador de televisión Halldór Már e o voluntario lingüístico Ramon Rom Sagristà.
Un grupo de estudantes de Filoloxía Galega puxo en marcha unha iniciativa, que reuniu en poucas horas centos de apoios, para que o termo “pintabeizos” se inclúa no Dicionario da Real Academia Galega, no cal se recollen as opcións ‘barra de labios’ e ‘lapis de labios’.
Fonte: Sermos Galiza
O Consello de Organizacións Sociais do Éuscaro, Kontseilua, defende que a lei foral relativa a esta lingua inclúa principios fundamentais como son a oficialidade, a normalización lingüística e os dereitos lingüísticos.
Fonte: Noticias de Navarra
O II Premio Luís Porteiro Garea ten como obxectivo recoñecer publicamente o traballo de persoas ou organizacións que traballan a prol do uso do galego na Universidade de Santiago e homenaxear a figura do profesor que lle dá nome, quen pronunciou en 1915 a primeira lección en galego no ámbito universitario.
Fonte: Consello da Cultura Galega
O Parlamento de Nova Zelandia anunciou que reducirá o tempo destinado á interpretación en lingua de signos nas sesións de preguntas orais. A medida responde a unha necesidade de non monopolizar estes servizos para que os profesionais poidan ofertalos tamén noutros ámbitos como os da saúde ou a xustiza.
Fonte: Scoop
Subscríbase ao boletín
