A Real Academia Galega publica, en edición dixital, o volume Toponimia de Agolada, obra que xa se pode consultar na páxina web da institución. Trátase dun traballo da académica correspondente Luz Méndez que analiza as orixes dos nomes das 24 parroquias e dos 163 lugares deste concello.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
12 de abril de 2018
O novo plan de dinamización do galego na mocidade que está a preparar a Xunta de Galicia, a través da Secretaría Xeral de Política Lingüística e da Dirección Xeral de Xuventude, Participación e Voluntariado, inclúe o deporte entre os ámbitos de actuación prioritarios na dinamización da lingua propia de Galicia na xente nova.
Fonte: O Portal da Lingua Galega
12 de abril de 2018
O Consorcio pola Normalización Lingüística de Cataluña impulsou un programa para o alumnado dos cursos de catalán, que realizou prácticas lingüísticas en locais comerciais de proximidade de toda a comunidade. Ata 1325 alumnos e alumnas, pertencentes a diferentes niveis, forman parte deste programa.
Fonte: GenCat
12 de abril de 2018
A Universidade de Santiago de Compostela (USC) e a Consellería de Cultura, Educación e Ordenación Universitaria, a través da súa Secretaría Xeral de Política Lingüística, fixeron entrega dos XIII Premios á Calidade Lingüística, uns galardóns outorgados polas comisións de normalización lingüística da universidade compostelá cos que as dúas institucións impulsan o uso e a visibilización do galego no ensino superior.
12 de abril de 2018
O Goberno de Navarra aprobou unha liña de axudas destinada ao fomento do éuscaro nos medios de comunicación. Esta iniciativa forma parte do Plan estratéxico do éuscaro, no que consta a necesidade de ampliar a presenza desta lingua na sociedade.
Fonte: Noticias de Navarra
12 de abril de 2018
Este venres, 13 de abril, remata o prazo de inscrición nas probas oficiais de acreditación do Celga 2018 convocadas pola Xunta de Galicia mediante a publicación no Diario Oficial de Galicia da resolución do 6 de marzo de 2018, da Secretaría Xeral de Política Lingüística, pola que se convocan as probas para a obtención dos certificados de lingua galega, niveis Celga 1, 2, 3 e 4, no ano 2018.
11 de abril de 2018
O concelleiro independente Diarmaid Ó Cadhla, do Condado irlandés de Cork, presentou unha proposta para incrementar o uso do gaélico na cámara municipal.
Fonte: Evening Echo
11 de abril de 2018
Un estudo da Universidade de California en Riverside revela que as persoas que falan dúas linguas poden inhibir e regular os seus impulsos no seu primeiro idioma cando se enfrontan a tarefas no segundo.
Fonte: Science Daily
11 de abril de 2018
O Goberno vasco confirmou a aprobación dunha nova liña de axudas que irá dirixida á promoción, desenvolvemento e normalización do uso da lingua vasca no ámbito dixital. Estas subvencións poderán destinarse tanto a proxectos novos como a outros que xa se atopen en marcha.
Fonte: La Vanguardia
11 de abril de 2018
O Goberno de Aragón anunciou a aprobación dos Estatutos da Academia Aragonesa da Lingua, de xeito que poderán contar cunha institución oficial que estableza as normas sobre o correcto uso das dúas linguas propias de Aragón, o aragonés e o catalán de Aragón, ademais de encargarse de defender e promover o uso normalizado destas.
Fonte: Heraldo
Boletín
Subscríbase ao boletín
