Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Os piares da Terra, un videoxogo baseado na serie de libros de Ken Follett, incorpora o galego no seu terceiro episodio, cando durante a visita de Aliena a Santiago de Compostela os personaxes do lugar falan esta lingua en todas as versións do xogo.
Fonte: Código Cero
O concello do municipio vasco de Zumaia abriu a convocatoria dunha bolsa que sirva para estudar a historia social do éuscaro no municipio, a fin de poñer orde á información existente e facer divulgación científica dos resultados.
Fonte: Noticias de Gipuzkoa
ERC presentou unha proposición de lei no Congreso para solicitar protección e promoción das linguas españolas oficiais distintas do castelán: catalán, éuscaro, galego e occitano.
Fonte: La Vanguardia
O Plan estratéxico 2018-2020 das Illas Baleares inclúe o incremento das subvencións destinadas ao fomento da lingua catalá, que será de ata 1 millón de euros para accións relacionadas co fomento do catalán nos medios de comunicación.
Fonte: OK Diario
Arredor de 400 linguas indíxenas sen status legal están en risco de desaparecer na India. Un cidadán do estado de Telengana iniciou unha campaña para preservar a lingua gondi que está en perigo a pesar de contar con falantes nun total de seis estados.
Fonte: Deutsche Welle
Os concellos e agrupamentos de concellos que conten con 3000 habitantes ou máis xa poden solicitar, ata o 2 de maio a través da sede electrónica da Administración autonómica, as axudas que convoca a Xunta de Galicia por medio da Secretaría Xeral de Política Lingüística para a promoción do uso da lingua galega.
Fonte: O Portal da Lingua Galega
A comisaria da Lingua Galesa, Meri Huws, recoñeceu que a lei en materia de lingua será de difícil aplicación nas universidades galesas. De acordo coa nova norma, todos os centros universitarios deben poder ofrecer docencia e materiais en galés nos mesmos niveis que o fan en inglés.
Fonte: BBC
A Axencia Galega de Industrias Culturais (Agadic), da Consellería de Cultura, Educación e Ordenación Universitaria, publica no Diario Oficial de Galicia (DOG) a convocatoria de subvencións para a promoción e difusión do cinema galego en 38 festivais de prestixio nacional e internacional celebrados entre o 1 de decembro de 2017 e o 30 de novembro do 2018.
Fonte: O Portal da Lingua Galega
A nova normativa proposta polo Goberno de Navarra esixe que as empresas subcontratadas polas administracións locais elaboren un plan de éuscaro para que o persoal se forme nesta lingua.
Fonte: Navarra.com
Esta nova edición do festival “A mocidade coa lingua” celébrase o 5 de abril no Auditorio de Ferrol co obxectivo fomentar a creatividade e o uso do galego no ámbito do lecer.
Fonte: Consello da Cultura Galega
Subscríbase ao boletín
