Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
En marzo de 2018 chegará a Navarra o Festival Navarro Infantil e Xuvenil de Cancións en Éuscaro, no que centenares de rapaces e rapazas da comunidade de entre 6 e 16 anos interpretarán diversos temas da cultura musical da súa terra en lingua vasca.
Fonte: Noticias de Navarra
A corporación británica BBC lanzou servizos de noticias en liña en dúas linguas de Nixeria, o igbo e o iorubá.
Fonte: The Citizen
O académico e poeta congolés Alain Mabanckou criticou con dureza o proxecto do presidente francés Emmanuel Macron de converter o francés en lingua de comunicación internacional. Segundo o autor, a iniciativa necesita unha profunda revisión porque pode ser un instrumento de imperialismo francés sobre as súas antigas colonias.
Fonte: The Guardian
Esta xornada, dedicada á tradución de literaturas estranxeiras ao galego, celebrarase o 14 de marzo e nela daranse cita profesionais da tradución que participarán nunha mesa redonda á que seguirán uns obradoiros para traducir desde diferentes linguas.
Fonte: Galicia Confidencial
O presidente da Mesa pola Normalización Lingüística e a responsable do proxecto Abertos ao Galego mantiveron un encontro con empresas participantes nesta iniciativa para avanzar no compromiso coa normalización lingüística.
Fonte: Sermos Galiza
O secretario xeral de Política Lingüística, Valentín García, presentou en rolda de prensa o Plan de formación en lingua galega do seu departamento para o presente ano 2018, que chegará a máis de 7000 persoas e incluirá formación Celga, formación en linguaxes administrativa e xurídica e formación no exterior.
Fonte: O Portal da Lingua Galega
A Consellería de Cultura e Política Lingüística do Goberno vasco defende que os procesos selectivos das Ofertas Públicas de Emprego (OPE) do País Vasco deben esixir o coñecemento do éuscaro como parte do seu proceso de normalización.
Fonte: ABC
Ante o éxito da primeira edición, que contara coa participación de máis de 250 participantes, o Concello de Zaragoza pon en marcha unha nova edición do Curso de Iniciación á Lingua Aragonesa, o cal está dirixido aos maiores de 14 anos que queiran aprender máis sobre aspectos sociais, históricos, artísticos e lingüísticos.
Fonte: Heraldo
A galería Photo Art de Ourense acolleu a presentación do catálogo do V Premio Galicia de Fotografía Contemporánea, que recolle o traballo To name a mountain, co que Alfonso Almendros se fixo co galardón da última edición deste certame.
Fonte: O Portal da Lingua Galega
O partido político New Zealand First quere aprobar unha lei que recoñeza o inglés como lingua oficial de Nova Zelandia ao igual que o maorí.
Fonte: Newshub
Subscríbase ao boletín
