Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Secretaría Xeral de Política Lingüística e a Dirección Xeral de Xuventude, Participación e Voluntariado da Xunta convocan unha nova edición do certame de declaracións de amor na rede Lingua de namorar, unha iniciativa que premiará por sexto ano a creatividade en lingua galega da xente nova.
Fonte: O Portal da Lingua Galega
A ministra de Educación de Nova Zelandia, Nikki Kaye, declarou que o goberno publicará unha lei que fomentará a aprendizaxe dunha segunda lingua no ensino primario e no primeiro ciclo da educación secundaria.
Fonte: NZ Herald
Unha consultora que traballa a prol do desenvolvemento rexional publicou un estudo que recomenda que o inglés se converta en lingua oficial dos intercambios comerciais na cidade de Helsinqui xa que é actualmente a lingua franca en moitos establecementos do centro da capital.
Fonte: Helsinki Times
O Goberno do País Vasco e a asociación Galtzagorri puxeron en marcha un programa para impulsar a lectura infantil e xuvenil en lingua vasca. Para isto, a asociación formará a profesorado en varios centros educativos do País Vasco.
Fonte: El Diario Vasco
O Concello de Barakaldo puxo en marcha un proceso participativo dirixido ás persoas vascófonas para fomentar o uso do éuscaro. En concreto, celebraranse tres encontros nos que se analizará a situación da lingua vasca no municipio, establecendo obxectivos para impulsar a súa utilización.
Fonte: elcorreo.com
A Biblioteca Nacional de España completou a primeira recompilación do dominio .gal por encargo da Biblioteca de Galicia, un traballo que supón a captura dos sitios web rexistrados baixo o devandito dominio.
Fonte: Galicia Confidencial
O secretario xeral de Política Lingüística, Valentín García, inaugurou no Centro Ágora da Coruña a mostra ‘Converxencias arte e ciencia’, que fará parada na Cidade Herculina entre os vindeiros 15 e 19 de xaneiro.
Fonte: O Portal da Lingua Galega
O ministro de Cultura de Portugal declarou que a canle da Radio Televisión Portuguesa de África se converteu na segunda máis vista nos países africanos de expresión portuguesa.
Fonte: Sapo 24
Os docentes de lingua de signos portuguesa non teñen os mesmos dereitos que o resto de profesores do ensino público e esixen agora que deixen de ser contratados como técnicos especialistas.
Fonte: Esquerda
O Parlamento da República de Macedonia aprobou por maioría dobre a lei que estende e garante o uso da lingua albanesa, falada por un cuarto da poboación, a todo o país.
Fonte: Fox News
Subscríbase ao boletín
