Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Unidade de Tecnoloxías da Lingua da Universidade de Bangor, no norte de Gales, desenvolveu un programa que permitirá crear unha voz sintética en lingua galesa para aqueles falantes que perdan a capacidade de falar por mor dunha enfermidade.
Fonte: Daily Post
O Goberno das Illas Baleares presentou unha campaña para impulsar a venda de xoguetes en lingua catalá e promover o uso desta lingua no ámbito lúdico. Baixo o título de "E ti, xogas en catalán?", a campaña está dirixida a tendas que venden xoguetes en catalán e pretende darlles máis visibilidade para fomentar o seu consumo entre a cidadanía.
Fonte: El Mundo
A Consellería de Cultura, Educación e Ordenación Universitaria publicou a convocatoria pública de dúas bolsas de formación nos lectorados de lingua, literatura e cultura galegas nas universidades Nova de Lisboa e Federal da Bahia.
Fonte: Consello da Cultura Galega
O TERMCAT publicou a "Terminoloxía da ciberseguridade", que elaborou en colaboración co Centro de Seguridade da Información de Cataluña (CESICAT) e con expertos na materia. Este dicionario contén máis de 250 palabras en catalán, con definicións equivalentes en castelán, inglés e francés.
Fonte: Generalitat de Catalunya
Os Bolechas súmanse por sexto ano consecutivo á celebración das festas de Nadal, da man da Rede de Dinamización Lingüística, Bolanda Edicións, Televisión de Galicia e Gadisa, e chegarán a oito concellos desde o vindeiro venres 22 de decembro ata o domingo 7 de xaneiro.
Fonte: O Portal da Lingua Galega
O Goberno dos Países Baixos quere revisar as políticas de integración de inmigrantes e imporá a necesidade de que estes aprendan neerlandés desde o momento da súa chegada.
Fonte: Dutch News
A Organización Internacional para a Estandarización, coñecida popularmente como ISO, acaba de recoñecer internacionalmente a lingua montenegrina como idioma separado do serbio.
Fonte: Balkan Insight
As institucións de Bilbao e Biscaia organizan, por sexto ano consecutivo, o encontro "Berbagunea" para promover o uso da lingua vasca na cidade de Bilbao. A xuntanza terá lugar o 14 de decembro de 2017 e asistirán máis de mil persoas amantes do éuscaro.
Fonte: ABC
A Deputación da Coruña asinou un convenio coa Mesa pola Normalización Lingüística para colaborar co proxecto A Liña do Galego, unha iniciativa dirixida á defensa dos dereitos lingüísticos.
Fonte: Sermos Galiza
Sateliun lanzou a versión en galego para dispositivos con sistemas Android da súa app de xeolocalización, a primeira aplicación móbil de xestión de frotas por GPS que está accesible nesta lingua.
Fonte: Código Cero
Subscríbase ao boletín
