Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
Tendo en conta os datos de padrón do Instituto Nacional de Estatística, os oito concellos que xa solicitaron a oficialidade da lingua asturiana representan o 62,79 % da poboación total da comunidade. Ademais, está previsto que o número de concellos a favor da lingua siga a aumentar.
Fonte: Asturies.com
A Universidade do País Vasco (UPV/EHU) participará na 52ª edición da Feira do Libro e Disco de Durango, que terá lugar entre os días 6 e 10 de decembro de 2017. En concreto, a UPV/EHU presentará trinta libros en éuscaro relacionados con diversas áreas de coñecemento, destinados tanto ao alumnado universitario como ao público en xeral.
Fonte: La Vanguardia
A Facultade de Ciencias Humanas e Sociais da Universidade Jaume I acolleu a presentación do "Libro de estilo da Corporación Valenciana de Medios de Comunicación (CVMC)". Trátase dun manual que funcionará como un modelo para mellorar o uso da lingua valenciana no ámbito do xornalismo.
Fonte: elperiodic.com
O Portal das Palabras organiza un ano máis, e xa van catro, a campaña para escoller a Palabra do Ano 2017. Nas tres edicións anteriores as escollidas foron irmandade (2016), refuxiados (2015) e corrupción (2014).
A Consellería de Cultura e Educación, a través da Secretaría Xeral de Política Lingüística e da Dirección Xeral de Educación, Formación Profesional e Innovación Educativa, coa colaboración da Corporación Radio e Televisión de Galicia e de OQOeditora, publicou nos portais Educativo e da Lingua Galega a convocatoria dos VII Premios a curtas de animación en galego Nós tamén creamos!.
Malia as polémicas xeradas por parte dos diferentes partidos políticos sobre a aprobación dunha lei que garanta a oficialización do gaélico en Irlanda do Norte, o uso deste idioma celta está a experimentar un tímido desenvolvemento. De acordo co último censo realizado, o 11 % da poboación de Irlanda do Norte pode falar gaélico a un certo nivel.
Fonte: CBC
A Asemblea Parlamentaria da Comunidade de Países de Lingua Portuguesa (CPLP) reuniu en Lisboa membros de todos os países de lingua oficial portuguesa. O deputado portugués, Carlos Páscoa, informou de que o ensino do portugués en Guinea Ecuatorial é aínda moi escaso.
Fonte: Diário de Notícias
De acordo con datos publicados polo Departamento de Saúde do Goberno do País Vasco, 188 161 persoas escolleron o éuscaro como lingua de preferencia para comunicarse co Servizo Vasco de Saúde. Así mesmo, estes datos indican que a porcentaxe de traballadores deste Servizo que acreditou o perfil lingüístico se multiplicou por tres.
Fonte: La Vanguardia
O Departamento de Ensino de Cataluña publicou a convocatoria de 2000 prazas para acceder ao corpo de docentes da Comunidade. Como é habitual, un dos requisitos para presentarse será ter coñecementos de catalán. Destas 2000 prazas, 136 están destinadas a profesorado de lingua catalá e literatura.
Fonte: Generalitat de Catalunya
O Parlamento de Quebec aprobou por unanimidade unha iniciativa que promoverá o saúdo en francés e non en bilingüe entre todos os comerciantes de Montreal e o resto da provincia canadense. A idea é fomentar o uso da lingua francesa no comercio.
Fonte: CTV News
Subscríbase ao boletín
