Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Comisión de Facenda e Política Financeira aprobou unha serie de emendas aos orzamentos para o departamento de Relacións Cidadás e Institucionais. Entre elas, salienta a emenda aprobada en relación co incremento de gastos por importe de 100 000 euros na partida "Axudas para o ensino de éuscaro a persoas adultas".
Fonte: Noticias de Navarra
O Departamento de Cultura e Lingua da Deputación de Pontevedra aprobou as bases do Pontegal 2018, cuxa principal novidade figura nos criterios de adxudicación, posto que se priorizarán a dinamización da lingua galega e a aposta pola igualdade de xénero.
Fonte: Deputación de Pontevedra
A sexta edición do programa de dinamización lingüística Nadal en Rede levará actividades a 41 concellos da Rede de Dinamización Lingüística (RDL) da Xunta de Galicia e porá á disposición de toda a cidadanía recursos dixitais para galeguizar os principais motivos do Nadal.
Fonte: O Portal da Lingua Galega
Máis de 300 empresas e entidades públicas do País Vasco dispoñen xa da certificación Bikain do uso do éuscaro no ámbito laboral, despois de que 35 novas institucións a conseguisen recentemente.
Fonte: eitb.eus
O grupo parlamentario de Esquerda Unida presentou unha emenda á lei de modificación do Consello Escolar para que a Academia da Lingua Asturiana teña presenza neste organismo. En concreto, solicítase que seis expertos no eido da educación e da pedagoxía entren no Consello para presentar propostas sobre a implantación do asturiano no sistema educativo.
Fonte: El Comercio
O secretario xeral de Política Lingüística, Valentín García, participou no acto de entrega de premios do III Certame Literario Mazarelos.
Fonte: O Portal da Lingua Galega
O ministro de Educación de Ucraína revelou as tres vías que se poderán seguir para aplicar a lei sobre a lingua de instrución no ensino. Estas tres opcións incorporan o ensino en ucraíno mais con matices en función da lingua do alumnado e a realidade sociolingüística do centro educativo.
Fonte: Unian
A Unidade de Tecnoloxías da Lingua da Universidade de Bangor, no norte de Gales, desenvolveu un programa que permitirá crear unha voz sintética en lingua galesa para aqueles falantes que perdan a capacidade de falar por mor dunha enfermidade.
Fonte: Daily Post
O Goberno das Illas Baleares presentou unha campaña para impulsar a venda de xoguetes en lingua catalá e promover o uso desta lingua no ámbito lúdico. Baixo o título de "E ti, xogas en catalán?", a campaña está dirixida a tendas que venden xoguetes en catalán e pretende darlles máis visibilidade para fomentar o seu consumo entre a cidadanía.
Fonte: El Mundo
A Consellería de Cultura, Educación e Ordenación Universitaria publicou a convocatoria pública de dúas bolsas de formación nos lectorados de lingua, literatura e cultura galegas nas universidades Nova de Lisboa e Federal da Bahia.
Fonte: Consello da Cultura Galega
Subscríbase ao boletín
