Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
O secretario xeral de Política Lingüística, Valentín García, clausurou a XXX edición dos Cursos "Galego sen fronteiras" que organiza a Real Academia Galega coa colaboración da Consellería de Cultura, Educación e Ordenación Universitaria e nos que tamén colaboran o Instituto da Lingua Galega da Universidade de Santiago de Compostela e mais a Deputación da Coruña.
Fonte: RAG
O secretario xeral de Política Lingüística, Valentín García, participou no acto de homenaxe literaria e musical da Real Academia Galega á poeta Luz Pozo Garza polo seu 95º aniversario.
Fonte: RAG
O Parlamento de Navarra aprobou unha achega de 18 150 euros para contratar unha asesoría técnica que elabore, desenvolva e avalíe o I Plan de éuscaro para o Parlamento de Navarra 2017-2020, que xirará ao redor de tres eixes principais: comunicación e imaxe corporativa, relacións externas e relacións internas.
Fonte: Navarra información
O occitano, o asturiano, o mirandés, o éuscaro, o bretón e o galego serán protagonistas no VI Festival Arcu Atlánticu, que se celebrará do 25 ao 30 de xullo de 2017, baixo o título "Un mar de linguas".
Fonte: Asturies.com
O ministro do Interior da India, Kiren Rijiju, responsable do Departamento de Linguas Oficiais, asegurou que o Goberno da India non ten a intención de antepor o hindi a ningunha outra lingua.
Fonte: Zeenews
O informe anual da S4C, a canle pública de televisión en galés, revelou un incremento no uso dos seus servizos en liña en todo o Reino Unido. En palabras do seu director, Huw Jones, este incremento é unha boa noticia para o uso da lingua galesa.
Fonte: Daily Post
O conselleiro de Cultura, Educación e Ordenación Universitaria, Román Rodríguez, visitou a sede da editorial Galaxia na cidade da oliveira, ocasión que aproveitou para reunirse co presidente do consello de administración da editorial, Antón Vidal Andión, e co novo director da casa, Francisco Castro, que substitúe no cargo ao actual presidente da Real Academia Galega, Vítor F. Freixanes.
Fonte: O Portal da Lingua Galega
O secretario xeral de Política Lingüística, Valentín García, e a directora xeral de Xuventude, Participación e Voluntariado, Cecilia Vázquez, visitaron o Campamento Xuvenil A Devesa de Ribadeo, onde presentaron a sétima edición do programa de dinamización da lingua galega nos campamentos de verán da Xunta de Galicia ‘O galego campa!’.
Fonte: O Portal da Lingua Galega
O Goberno de Aragón, a través da Dirección Xeral de Política Lingüística, convocará os premios de literatura Arnal Cavero en aragonés e Guillem Nicolau en catalán. Os dous premios contan cunha dotación de 3 000 euros cada un.
Fonte: El Periódico de Aragón
Os vicepresidentes do Consello de Mallorca, Francesc Miralles e Jesús Jurado, trataron os traballos desenvolvidos polo servizo de normalización lingüística nos últimos dous anos, dos que agora deberá encargarse a nova dirección de Política Lingüística.
Fonte: EcoDiario.es
Subscríbase ao boletín
