Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
As xornadas Mergullo na Lingua Portuguesa de Hamburgo, a Semana da Lingua Portuguesa de Colonia e as Lusitaníadas de Osnabrück son algunhas das iniciativas que se desenvolven en Alemaña para promover e dinamizar o ensino da lingua de Camões.
Fonte: Mundo Português
O concerto solidario polas vítimas do incendio forestal de Pedrógão Grande no distrito portugués de Leiría foi interpretado integramente á lingua de signos portuguesa.
Fonte: Sol
A entidade que xestiona a rede de ferrocarrís da India deu o visto e prace para que os billetes poidan emitirse na lingua local dos diferentes estados, ademais de hindi e inglés.
Fonte: News 18
O uso do chinés mandarín duplicouse na cidade de Hong Kong desde 1997, ano en que a rexión deixou de pertencer ao Reino Unido. Porén, sobre todo entre a xente nova, as persoas están optando actualmente por empregar só a lingua local, o cantonés, porque ven o chinés mandarín como un símbolo da influencia cultural de China. Moitas persoas temen mesmo que esta situación poida pór en risco a supervivencia do cantonés.
Fonte: BBC
A Comisión de Cultura da Cámara autonómica aprobou unha iniciativa de EH Bildu pola que se lle solicita ao Goberno vasco que introduza criterios lingüísticos na convocatoria de subvencións para renovar os fondos das bibliotecas. O obxectivo desta medida é asegurar que unha porcentaxe das publicacións sexa en éuscaro.
Fonte: 20 minutos
O Departamento de Educación, Cultura e Deporte do Goberno de Aragón impulsou o programa "Agora polo aragonés", que está destinado a persoas, comercios, asociacións, empresas, profesionais e institucións para coñecer, aprender e estender o uso da lingua aragonesa.
Fonte: El Periódico de Aragón
Os Premios Lois Peña Novo recoñecen na súa XXIII edición o labor a prol da normalización da lingua galega da maxistrada Sandra Piñeiro, do profesor Xurxo Mariño e da Asociación Cultural e Pedagóxica Ponte... nas Ondas!
Fonte: O Portal da Lingua Galega
A Xunta de Galicia vén de reafirmar o seu compromiso co importante labor que desenvolve a Real Academia Galega (RAG) mediante o convenio asinado polo conselleiro de Cultura, Educación e Ordenación Universitaria, Román Rodríguez González, e o presidente desta institución académica, Víctor Fernández Freixanes. O convenio conta cun orzamento de 520 000 euros para a realización de accións culturais, investigación científica e investimentos.
O Consello da Cultura Galega edita por vez primeira en galego a teoría da relatividade cando se cumpren cen anos desde a publicación do texto orixinal de Albert Einstein en 1917.
Fonte: Consello da Cultura Galega
O secretario xeral de Política Lingüística, Valentín García, destacou a Carta Europea para as Linguas Rexionais ou Minoritarias (CELRM) como “o primeiro texto internacional dedicado especificamente ao recoñecemento de dereitos lingüísticos”. Fíxoo durante a súa intervención no acto de inauguración do Foro de debate sobre a CELRM que acolle o Consello da Cultura Galega coa colaboración do Consello de Europa.
Subscríbase ao boletín
