Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A Mesa pola Normalización Lingüística solicita que a denominada 'cesta de benvida' que entrega a Xunta para os bebés acabados de nacer leve materiais en galego. Por este motivo, a entidade presentou unha proposta de caixa alternativa con produtos nesta lingua como libros infantís, un DVD con nanas ou roupa con frases en galego.
Fonte: CRTVG
O Congreso dos Deputados rexeitou que o coñecemento das linguas cooficiais sexa un requisito para os maxistrados, os xuíces e os fiscais da Administración de Xustiza que exercen a súa profesión en Galicia, Cataluña, País Vasco, illas Baleares e Comunidade Valenciana.
Fonte: Generalitat de Catalunya
O Plan estratéxico de política lingüística 2016-2019 está a ser sometido a participación pública da cidadanía e con el preténdese fomentar a aprendizaxe do éuscaro e impulsar e estender o seu uso social.
Fonte: Pamplona Actual
O Portal da Lingua Galega e o Portal Educativo (http://www.edu.xunta.gal/portal/node/20227) publicaron unha nova convocatoria do Concurso-Exposición Letras Galegas, que cada ano se leva adiante co obxectivo de potenciar o coñecemento do autor homenaxeado o 17 de maio, da situación sociolingüística que lle tocou vivir e, en xeral, da súa época histórica.
LGx15. Ideas para o futuro da lingua é un proxecto impulsado pola Coordinadora de Traballadores/as de Normalización da Lingua. A edición deste ano celebrarase o 24 de novembro e nela haberá oito presentacións con argumentos e consellos para influír nas actitudes e na conciencia lingüística.
Fonte: CTNL
O encargado da Comisión Europea de levar adiante as negociacións do Brexit, Michel Barnier, anunciou que desexa que estas se leven a cabo exclusivamente en francés. Esta decisión cambiaría a práctica habitual de optar polo inglés para abordar asuntos internacionais no seo da Unión Europea.
Fonte: Politico
O secretario xeral de Política Lingüística, Valentín García, acompañou o escritor Carlos Labraña na presentación de dúas obras do autor que acolleu a Biblioteca Ánxel Casal.
Fonte: O Portal da Lingua Galega
O Centro Galego de Arte Contemporánea (CGAC) foi o escenario da presentación do novo libro de Rosalía Morlán, que leva por título Nas rúas de Compostela.
Fonte: O Portal da Lingua Galega
O conselleiro de Cultura, Educación e Ordenación Universitaria en funcións, Román Rodríguez, lembrou o importante labor de Xaime Isla Couto como introdutor da “modernidade e o progreso á cultura e sociedade galegas”.
Fonte: O Portal da Lingua Galega
Os Premios Ari(t)mar da Música e da Poesía Galego-Portuguesa celebran a súa primeira gala de entrega no compostelán Teatro Principal para recoñecer e afianzar os vínculos lingüísticos e culturais ás dúas beiras do Miño.
Fonte: O Portal da Lingua Galega
Subscríbase ao boletín
