A oferta de materias en catalán nos mestrados das universidades públicas de Cataluña reduciuse a un terzo, mentres que aumentou en castelán e inglés. Nos graos, a presenza desta lingua segue sendo maioritaria, pero tamén diminuíu lixeiramente nos últimos seis anos. A Universidade de Xirona é a que máis utiliza o catalán (84 %), mentres que a UPF é a que menos (45 %), debido á súa vocación internacional.

Claire Hanna, líder do Partido Social Demócrata e Laborista de Irlanda do Norte, marcou un fito histórico ao empregar o irlandés durante a sesión de preguntas ao primeiro ministro no Parlamento británico. Coincidindo co día de San Patricio, Hanna abriu a súa intervención cun saúdo en irlandés, subliñando a relevancia de preservar e celebrar a lingua e a cultura irlandesas a nivel global.

Fonte: Irish Central

O Tribunal Superior de Xustiza de Galicia rexeitou o recurso que reclamaba o uso do castelán en toda a documentación e rótulos do CEIP Cidade Vella da Coruña, ao considerar que a normativa avala o galego como lingua por defecto na educación. O tribunal recoñece o dereito das familias a recibir comunicacións en castelán se o solicitan, mais non a esixir que toda a documentación interna estea neste idioma. A sentenza conclúe que non se vulnerou a cooficialidade lingüística nin os dereitos do demandante.

Trece sindicatos reclamaron nun manifesto a reforma do Estatuto de Autonomía para garantir a oficialidade do asturiano e do eonaviego. No acto, destacaron que a protección destas linguas favorecería o desenvolvemento cultural, social e económico de Asturias, como ocorre noutros territorios bilingües. A iniciativa xorde tras a toma en consideración da reforma no parlamento asturiano, aínda sen a maioría necesaria para a súa aprobación.