O conselleiro de Cultura, Lingua e Xuventude, José López Campos, enxalzou o valor do audiovisual como “unha ferramenta con grandes posibilidades para potenciar a creatividade, e en galego, entre os escolares da Comunidade”. Así o valorou na entrega dos premios ás mellores curtametraxes de animación do concurso «Nós tamén creamos!» 2024-2025, no Centro Galego de Arte Contemporánea.
Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
19 de xuño de 2025
19 de xuño de 2025
Centos de persoas participaron no Araba Euskaraz 2025, unha festa das ikastolas arabesas que ten como obxectivo reivindicar o impulso do uso do éuscaro baixo o lema ‘Etengabe’. A celebración incluíu espectáculos, concertos e actividades dirixidos especialmente á infancia e á mocidade.
Fonte: EFE
18 de xuño de 2025
Portugal reforma a súa lei migratoria para ampliar os dereitos dos inmigrantes cualificados de países lusófonos. A nova norma facilita o acceso á residencia e ao emprego e reforza a cidadanía lingüística da Comunidade de Países de Lingua Portuguesa (CPLP), equiparando condicións mediante o recoñecemento da lingua e das cualificacións profesionais.
Fonte: Público
18 de xuño de 2025
Ucraína anunciou o desenvolvemento do seu primeiro modelo de linguaxe amplo (LLM) en ucraíno, presentado polo Ministerio de Transformación Dixital e Kyivstar, a principal empresa de telecomunicacións do país.
Fonte: Capacity Media
18 de xuño de 2025
A Xunta e a Real Academia Galega incorporan doce novos concellos das catro provincias galegas á nova edición da campaña Toponimízate. Falámosche dos nomes da túa terra, que organizan conxuntamente e coa que “se salvagarda e divulga o importante patrimonio inmaterial que atesoura a toponimia galega”. Así o puxo en valor na súa presentación o secretario xeral da Lingua, Valentín García, quen salientou os “resultados máis que satisfactorios” deste proxecto, “ao contar con case 4.000 colaboradores e preto de 90.000 microtopónimos recuperados desde que se puxo en marcha en 2019”.
18 de xuño de 2025
O Goberno de Navarra e a asociación Laba Elkartea asinaron un convenio para promover o uso social do éuscaro en Pamplona, con especial atención á mocidade. O acordo, cun orzamento de 26 000 euros para 2025, inclúe proxectos como a acollida de persoas migrantes, bolsas para novos proxectos sobre o éuscaro e actividades para fortalecer a comunidade euscaldún.
18 de xuño de 2025
Softcatalà presentou o seu novo dicionario inglés-catalán, unha ferramenta en liña gratuíta con 50 000 entradas en inglés e 46 000 en catalán e que ofrece traducións e exemplos de uso extraídos de corpus paralelos para mostrar as palabras no seu contexto. Aínda que o dicionario seguirá mellorando con novas entradas, tamén se presenta como unha referencia para mellorar a calidade das traducións en empresas e na lingua catalá en xeral.
18 de xuño de 2025
Os Premios á calidade lingüística en galego dos traballos académicos, traballos de fin de grao e traballos de fin de mestrado, que chegan á súa 21ª edición, teñen como obxectivo promover o uso dun galego de calidade entre o alumnado da USC.
18 de xuño de 2025
A Xunta de Galicia iniciará un proceso de diálogo co Goberno central para garantir que o novo sistema de xestión procesual que vai implantar o Ministerio de Xustiza esta dispoñible tamén en lingua galega. Así llo informou o conselleiro de Cultura, Lingua e Xuventude, José López Campos, aos representantes da Irmandade Xurídica, cos que se reuniu para trasladarlle a súa preocupación sobre que o Goberno central habilite só en castelán a plataforma Atenea, que substitúe á anterior, Minerva.
17 de xuño de 2025
A Universidade de Nottingham anunciou que reducirá o persoal docente do seu centro de linguas, o que suscitou críticas por pór en perigo o seu carácter global.
Fonte: BBC
Boletín
Subscríbase ao boletín
