Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A mostra itinerante “Nimbos de Luz” -promovida pola Consellería de Cultura, Educación e Ordenación Universitaria por medio das secretarías xerais de Política Lingüística e de Cultura- fai parada estes días no IES Fernando Blanco de Cee.
Fonte: Xunta de Galicia
A porcentaxe de catalán como lingua habitual é maioritaria nas Terras do Ebro e sitúa este territorio por riba da media catalá. Ademais, o coñecemento da lingua catalá aumentou nos últimos anos no ámbito territorial das Terras do Ebro. Un total de 33 453 persoas que non o tiñan como lingua inicial cando eran pequenos, saben falalo actualmente.
Fonte: Generalitat de Cataluña
O deputado do grupo MÉS, Nel Martí, instou o Goberno balear a que garanta a recepción das canles de televisión en lingua catalá nas illas Baleares, cuxa emisión está en perigo ante a inminente repartición de frecuencias realizada polo Goberno.
Fonte: 20 minutos
Venezuela mostrouse partidaria de recuperar as tradicións lingüísticas indíxenas despois da recente clasificación da lingua mapoio como Patrimonio Cultural Inmaterial da Humanidade. Este recoñecemento forma parte do esforzo do Goberno venezolano por "reivindicar os valores humanos e toda a diversidade cultural" do país, explicou o embaixador de Venezuela na Organización das Nacións Unidas (ONU). A constitución venezolana recoñece actualmente un total de 34 idiomas oficiais.
Unha empresa de nova creación da Universidade do Miño (Portugal) está a desenvolver un tradutor para a lingua de signos portuguesa que poderá axudar a resolver moitos dos problemas cos que se atopan no seu día a día os cidadáns xordos portugueses.
Fonte: Correio do Minho
Alemaña, Croacia, Francia, Polonia, Romanía … e mesmo China, este cuadrimestre foron arredor de 40 as mozas e mozos que chegados de diferentes lugares da xeografía mundial aproveitaron a súa estancia en Galicia para coñecer máis de preto a lingua e a cultura do destino que elixiron para realizar as súas estadías internacionais.
Fonte: Universidade de Vigo
O Departamento de Saúde do Goberno de Navarra vai implantar no Hospital Reina Sofía de Tudela un sistema de videointerpretación da lingua de signos co fin de favorecer a accesibilidade á información e á comunicación das persoas xordas e favorecer a igualdade de oportunidades deste colectivo no acceso á saúde.
Fonte: La Información
O Goberno vasco destinará 774 000 euros para poñer a disposición de todos os profesionais xurídicos que traballan en Euskadi as ferramentas necesarias para que poidan exercer o seu traballo integramente en éuscaro.
Fonte: El País
O Consello Nacional de Educación de Turquía presentou unha proposta que pretende introducir materias de lingua turca otomá nos centros de ensino secundario. A iniciativa orixinou un importante debate sobre a necesidade de aprender esta lingua e algúns membros declararon que esta opción debe ser opcional e non obrigatoria.
Fonte: Hurriyet Daily News
Qiu Yuanping, xefa da Oficina de Asuntos Chineses no Estranxeiro do Consello de Estado de China, declarou, con motivo dunha conferencia, que o país asiático formará 30 000 docentes de chinés como lingua estranxeira antes de finais de 2017 co fin de fomentar a lingua e cultura chinesas no estranxeiro.
Fonte: Business Standard
Subscríbase ao boletín
