Información do día a día do galego e outras linguas
Novas
Coñeza a actualidade sobre as linguas do mundo que lle proporciona o Observatorio da Lingua Galega. A información actualízase a diario e recóllese dunha ampla gama de fontes, nacionais e internacionais: dende medios de comunicación ata webs de diferentes organizacións e institucións relacionadas coas linguas.
A partida orzamentaria destinada ao desenvolvemento do ensino do éuscaro en Navarra vai en caída libre. O recorte que sufriron estes programas nos últimos seis anos ascende a un 88 %, dos 639 389 euros aprobado en 2009 aos 78 200 euros que recolle o anteproxecto de orzamentos presentado polo Goberno foral.
Fonte: Noticias de Navarra
Un total de 254 centros escolares das redes pública e privada de Euskadi presentaron a súa solicitude de recursos económicos e humanos para implantar un modelo trilingüe onde o inglés sexa a lingua vehicular xunto ao éuscaro e o castelán. Estes centros optan a 1,7 millóns de euros en axudas para o presente curso académico.
Fonte: Diario Vasco
O secretario de Estado de Cultura de Portugal, Jorge Barreto Xavier, asinou un acordo de colaboración co Brasil para o investimento de 3,2 millóns de euros na "produción e difusión de contidos audiovisuais" entre os países membros da Comunidade de Países de Lingua Portuguesa (CPLP).
Fonte: Dinheiro Digital
Oliver O'Brien, un investigador do University College de Londres, empregou os datos do censo realizado no Reino Unido en 2011 para reflectir nun mapa a lingua máis habitual dos habitantes que viven a 200 metros de cada unha das paradas de metro da capital británica.
Fonte: Citymetric
O Goberno francés concedeu aos institutos de ensino secundario San Isidro e Gabriel García Márquez de Madrid a distinción "Label FrancEducation", que o Ministerio de Asuntos Exteriores galo outorga a centros educativos estranxeiros pola súa difusión da lingua e cultura francesas.
Fonte: Comunidad de Madrid
Un grupo de investigadores da Universidade de Glasgow acaba de completar a primeira fase do arquivo dixital máis extenso do gaélico escocés que inclúe unha base de datos de 10 millóns de termos.
Fonte: Herald Scotland
O proxecto Gaelaico sostén que a orixe do topónimo da Coruña está relacionado coa forma circular da baía.
Fonte: La Opinión
Os centros educativos públicos andaluces comezaron a impartir chinés en 2011. Tratábase dun programa experimental e impartíase como actividade extraescolar, pero 648 menores e adultos matriculáronse nese ano. En 2013-2014, a cifra de estudantes xa se duplicara. Este curso hai uns 2000, en concreto 1950, o que supón un 200 % máis que hai tres anos.
Fonte: 20 minutos
A Mesa das Cortes Valencianas tramitou a certificación emitida pola Xunta Electoral da Comunidade Valenciana sobre as sinaturas recollidas para a iniciativa lexislativa popular por unha radiotelevisión pública en valenciano.
Fonte: Las Provincias
A empresa norueguesa Statoil, unha das maiores referencias mundiais da industria petroleira, acaba de adoptar o portugués como lingua oficial. A partir de agora, a documentación da empresa estará dispoñible en noruegués, inglés e portugués.
Fonte: Diário de Notícias
Subscríbase ao boletín
